«Маскүнемдерден бес баладан туады»: Дмитрий Биволдың экс-жұбайы қазақстандықтарды қорлады

Әлем чемпионы Дмитрий Биволдың экс-жұбайы әлеуметтік желідегі жазбаларымен қазақстандықтардың ызасына тиді, деп хабарлайды Orda.kz.

Екатерина Бивол Instagram парақшасында қазақстандық аудиторияны сауатсыз, надан халыққа теңеді. Оның айтуынша, қазақстандықтар тек маскүнемдерден бала табуды ғана біледі.

«90 мың аудиторияның жартысы сөзді де түсінбейтін, ауылда тұратын, маскүнемдерден бес баладан туатындар. Маған ондайлардың орнына 30–40 мың ақылды мәскеуліктер де жетеді» деп жазды Екатерина Бивол.

Бұл сөздер желі қолданушыларының ашу-ызасын туғызды. Әсіресе, ауыл тұрғындары мен көпбалалы аналарға қатысты қорлайтын пікірлер әлеуметтік желілерде қызу талқыланып жатыр.

«Сіздер – Биволдың аудиториясы. Ал мен ресейлікпін. Маған қазақстандықтардың қолдауы қажет емес» деп қосты Екатерина.

Айта кетейік, небәрі екі жыл бұрын ол «Менің әкем Қазақстаннан» деп мәлімдеп, қазақстандық жанкүйерлердің ықыласына бөленген еді.