WBO Жәнібек Әлімханұлының титулдан бас тартуын қабыл алды

Дүниежүзілік бокс ұйымы — WBO қазақстандық боксшы Жәнібек Әлімханұлының титулы бойынша ресми мәлімдеме жасады. Бұған дейін ол басқа салмақ дәрежесіне өтетінін мәлімдеген еді, деп хабарлайды Orda.kz.       

WBO әлеуметтік желідегі X парақшасында ресми қаулысын жариялады. Ұйым Жәнібек Әлімханұлының орта салмақтағы WBO әлем чемпионы атағынан өз еркімен бас тартқанын растады. Осыған байланысты уақытша чемпион болған Дензел Бентли толыққанды әлем чемпионы мәртебесіне көтерілді.

«Дензел Бентли WBO-ның орта салмақтағы уақытша чемпионы мәртебесінен ресми түрде толыққанды әлем чемпионы дәрежесіне көтеріледі және бұл мәртебеге тиесілі барлық құқықтарға, артықшылықтарға, міндеттер мен өкілеттіктерге ие болады» деп жазылған ұйымның чемпиондық комитеті шешімінде. 

Сондай-ақ қазақстандық боксшы тарапынан жаңа салмақ дәрежесіне ауысатыны туралы ресми хабарлама биылғы жылдың 13 шілдесінде жолданғаны белгілі болды.

Еске сала кетейік, бұған дейін WBO басшысы Густаво Оливьери The Ring басылымына берген сұхбатында Жәнібек Әлімханұлының орта салмақтағы титулдан бас тартып, суперорта салмаққа өтетінін айтқан болатын.

Бұл ақпаратты спортшының өзі де растады. Сонымен қатар Жәнібек жаңа салмақ дәрежесіне байланысты Сауль Альвареске үндеу жасады.

Оқи отырыңыз:

• Жәнібек Әлімханұлы әлем чемпионы атағынан айырылды
• Жәнібек Әлімханұлы допинг қолданды деген күдікке ілінді
• Жәнібек Әлімханұлы британдық боксшы Дензел Бентлидің сөзіне жауап берді