32 ауыр жүк көлігі жолда қалды: Артық жүк артқан тасымалдаушылар жазаланды

Петропавл маңындағы жүк тасымалдаушылардың әрекеті қатаң шара қолданумен аяқталып, 14 миллион теңгеден астам айыппұл салынды, деп хабарлайды Orda.kz.       

Солтүстік Қазақстан облысында жүк тасымалдаушылар тарапынан салмақ-габариттік бақылауды айналып өтудің ауқымды әрекетінің жолы кесілді. Артық жүкпен құрылыс материалдарын тасымалдаған 32 ауыр жүк көлігінің жүргізушісі наразылық ұйымдастырып, техникаларын жол жиегіне қалдырып, Петропавл қаласына кіреберісті жауып тастаған.

Нәтижесінде жаппай тексеру жүргізіліп, жүзге жуық әкімшілік іс қозғалып, миллиондаған теңге айыппұл салынды.

Еске салайық, оқиға Петропавлға кіреберістегі көліктік бақылау бекетіне жақын маңда болған. 32 жүк көлігінің жүргізушілері рұқсат етілген салмақтан асқаны үшін жазадан құтылмайтынын түсініп, көліктерін жол жиегіне тастап кеткен.

Алайда тасымалдаушылардың тексерістен «жалтарып кету» жоспары іске аспады. Іске полиция араласып, тастап кеткен жүк көліктерінің барлық иелерін жедел анықтады. Тексеру қорытындысы бойынша құқық бұзушыларға 14 млн теңгеден астам айыппұл салынды. Жалпы 93 әкімшілік құқық бұзушылық дерегі тіркелді.

Бұған қоса, осы оқиғадан кейін өңірде талап күшейтілетін болды.

Енді жол жамылғысының сақталуына жауапкершілік жеткізу тізбегінің барлық қатысушыларына жүктеледі. Мысалы, карьер басшылары рұқсат етілген салмақтан асатын көліктерге материал тиеуді толық тоқтатуға міндетті. Сондай-ақ мердігер ұйымдар мен тасымалдаушылардың өздері де жауапкершілікке тартылады.

Көліктік бақылау инспекциясы мен полиция департаменті мұндай рейдтер мен қалаға кіреберістердегі бейберекет әрекеттердің жолын кесу шаралары енді тұрақты әрі күшейтілген бақылау режимінде жүргізілетінін мәлімдеді.

Оқи отырыңыз:

• Алматы – Ташкент жолында мотор майын тасымалдаған жүк көлігі аударылып, өртенді
• 2027 жылы елімізде жүргізушісіз жүк көліктері мен таксилер пайда болады
• Алматыда ер адам жүк көлігінің астына түсіп қаза тапты