Қазақстанда жол ережесін бұзатындарға тұзақ көбейді: Дрон, камера және лазер іске қосылды

Қазақстан Ішкі істер министрлігі жүргізушілерге үндеу жасап, цифрлық технологиялардың көмегімен жол қозғалысын бақылау күшейтілетінін ескертті, деп хабарлайды Orda.kz Polisia.kz-ке сілтеме жасап.

ІІМ Әкімшілік полиция комитеті төрағасының орынбасары Бағланбек Айтпаевтың айтуынша, полиция қызметкерлеріне жол қозғалысы ережелерін бұзушылықтарды анықтауға, қауіпті жағдайларға жедел әрекет етуге және жол-көлік оқиғаларының алдын алуға ұшқышсыз ұшу аппараттары, патрульдік көліктердегі мобильді кешендер, орташа жылдамдықты бақылау жүйелері және лазерлік кешендер көмектеседі.

Ұшқышсыз ұшу аппараттары жол қозғалысын бақылауды қамтамасыз етеді. Енді жылдамдықты шамадан тыс асыратын және жол қозғалысы ережелерін өрескел бұзатын жүргізушілер жауапкершіліктен оңай құтыла алмайды, өйткені құқық бұзушылықтар әуеден тіркеледі. Ең бастысы, ұшқышсыз аппараттардың көмегімен құқық бұзушылықтарға жедел әрекет ету азаматтардың өмірі мен денсаулығын сақтауға мүмкіндік береді.

Тағы бір тиімді құрал – патрульдік көліктерге орнатылған мобильді кешендер. Олар көлік ағыны кезінде жол қозғалысы ережелерінің бұзылуын оңай анықтайды. Мысалы, көлік жүргізу кезінде ұялы телефон пайдалану, жаяу жүргіншіге жол бермеу, белгіленген жылдамдықты асыру және маневр жасау ережелерін бұзу сияқты құқық бұзушылықтар тіркеледі.

Ал қала сыртындағы тасжолдарда жылдамдықты асыруды ұнататын жүргізушілерге орташа жылдамдықты бақылау жүйесі қолданылады. Ол көліктің қозғалысын талдайды. Қазіргі уақытта бұл жүйе республикалық маңызы бар 12 негізгі бағытта енгізілген.

Жол-көлік оқиғаларының алдын алу үшін лазерлік жүйелер де пайдаланылады. Олар әсіресе түнгі уақытта, көлік жүргізіп келе жатып ұйқысы келетін жүргізушілерге, сондай-ақ ауа райы қолайсыз болған жағдайда маңызды.

«Цифрлық технологиялармен қатар, жолдарда жүріс бөлігін жасанды түрде тарылту жұмыстары да жүргізілуде. Бұл жүргізушілердің жылдамдықты төмендетіп, назарын жолға көбірек аударуына және қозғалысты барынша сақтықпен жалғастыруына мүмкіндік береді», – деді ІІМ өкілі. 

Оның айтуынша, аталған шаралардың барлығы азаматтардың қауіпсіздігін арттыруға және жолдардағы апаттылық деңгейін төмендетуге бағытталған.

Оқи отырыңыз:

• Колумбияда алапат жер сілкінісі болып, 112 адам қаза тапты
• Канье Уэстің концерті өтетін күні Алматыда үш көше жабылады: Алаяқтар билет сатып жатыр