ҚР Салық кодексі жобасына шетелдік қаражат үшін есеп беру міндеті енгізілді

Шетелдік қаржыландыру үшін есеп беру міндеті Қазақстанның Салық кодексі жобасына енгізілді, деп хабарлайды Orda.kz.      

«Жаңа Салық кодексі жобасында шетелдік мемлекеттерден, халықаралық және шетелдік ұйымдардан, шетелдіктерден, азаматтығы жоқ тұлғалардан ақша және (немесе) өзге де мүлікті алу, жұмсау кезіндегі тұлғаның және (немесе) заңды тұлғаның құрылымдық бөлімдерінің міндеттері ескерілген», - деп хабарлады премьер-министр Олжас Бектенов мәжіліс депутаттарының сауалына жауап бере отырып.

 Бұған дейін  мәжілісмендер шетелдік қорлар мен ҮЕҰ арқылы Қазақстанның ішкі саясатына, атап айтқанда, депутаттардың пікірінше, идеологиялық жат құндылықтарды (ЛГБТ, радикалды феминизм, субмәдениеттер) жақтайтын және ұлттық тұрақтылыққа нұқсан келтіретін USAID қаржыландыратын сыртқы араласу мәселелерін көтерген болатын.

Парламентарийлер ұлттық құндылықтар негізінде ішкі саясат пен идеологияны қорғау, шетелдік қаржыландыруға бақылауды күшейту, осындай ұйымдардың қызметін реттеудің заңнамалық тетіктерін әзірлеу, сондай-ақ қоғамды біріктіруге және мемлекеттік мүдделерді деструктивті ықпалдан қорғауға қабілетті ел тарихындағы алғашқы Ішкі саясат тұжырымдамасын дайындау қажеттігі туралы мәлімдеді.

Бұдан бұрын Илон Маск USAID-ті COVID-19 дамуын қаржыландырды деп айыптаған болатын.

БҰҰ мәліметінше, халықаралық гуманитарлық көмектің 40 пайызы USAID-тың үлесінде. АҚШ Конгресі мақұлдаған ондаған миллиард доллар халықаралық көмекті басқаратын USAID-ты Маск «қылмыстық ұйым» деп атады.

28 наурызда АҚШ Мемлекеттік департаменті Конгресті  USAID - АҚШ Халықаралық даму агенттігінің таратылғаны туралы ресми түрде хабардар етті.

Артынша АҚШ халықаралық даму агенттігінің (USAID) қаржыландыруы тоқтатылған гранттар тізімі жарияланды.

Ақ үй халықаралық даму агенттігінің (USAID) күмәнді шығындарын көрсетті, оның ішінде Қазақстандағы қандай жобаларды Америка қаржыландырғаны аталды.