Вашингтондағы USAID штаб-пәтері жабылды

Президент Дональд Трамп әкімшілігі АҚШ-тың халықаралық көмек жөніндегі негізгі ұйымына шүйлікті, деп хабарлайды Orda.kz. 

АҚШ-тың мемлекеттік хатшысы Марко Рубио АҚШ халықаралық даму агенттігінің басшысы қызметін қоса атқаратынын мәлімдеді. Ол USAID қызметтерінің көбі жалғасатынын, АҚШ сыртқы саясатының бөлігі болып қала беретінін айтты. Кейбір мәліметтерде агенттік мемлекеттік департаментке қосылатыны, жұмыс күші едәуір қысқаратыны, бірақ гуманитарлық көмек көрсететін ұйым болып қала беретіні айтылып жатыр.

Трамп мемлекет шығынын азайтушы қызметіне тағайындаған Илон Маск USAID жұмысын қатаң сынады. Маск АҚШ бюджетіндегі дефицитті 1 триллион долларға қысқартатынын мәлімдеп, өз әрекетін жемқорлыққа қарсы күрес деп бағалап отыр.

БҰҰ мәліметінше, халықаралық гуманитарлық көмектің 40 пайызы USAID-тың үлесінде. АҚШ Конгресі мақұлдаған ондаған миллиард доллар халықаралық көмекті басқаратын USAID-ты Маск «қылмыстық ұйым» деп атады.

USAID азаматтық сыртқы көмек пен даму саласындағы ынтымақтастықты басқаруға жауапты. Тәуелсіз агенттіктің жылдық бюджеті 42,8 миллиард доллар.