«Қорғаста» ҚҚС-тан босатылған 19 инвесторға екі жыл бойы заңсыз төлем есептелген

«Қорғас» халықаралық шекара маңы ынтымақтастығы орталығы басқарушы компаниясы инвесторға екі жыл бойы заңсыз түрде қосылған құн салығын (ҚҚС) есептеген, деп хабарлайды Orda.kz.       

Жалпы құны 70 млрд теңгеден асатын жобаларды жүзеге асырып жатқан 19 инвесторға су жеткізу тарифтерін қалыптастыру кезінде заңсыз түрде қосылған құн салығы (ҚҚС) есептеліп отырған. Бұл туралы Бас прокуратураның баспасөз қызметі хабарлады.

«Инвесторлар құқықтарын қорғау комитетінің үйлестіруімен Жетісу облысы прокуратурасы «Қорғас» халықаралық шекара маңы ынтымақтастығы орталығының басқарушы компаниясы қызметінде өрескел заң бұзушылықтарды анықтады. Анықталғандай, екі жыл бойы жалпы құны 70 млрд теңгеден асатын жобаларды жүзеге асырып жатқан 19 инвесторға су жеткізу тарифтерін есептеу кезінде заңсыз түрде қосылған құн салығы есептелген» деп жазылған хабарламада.

Сонымен қатар, Салық кодексіне сәйкес, арнайы экономикалық аймақ аумағындағы қызмет ҚҚС-тан босатылады. Алайда бұған қарамастан, заңнама талаптары жүйелі түрде сақталмаған. Нәтижесінде, ведомство мәліметінше, инвесторлар негізсіз қаржылық шығындарға ұшырап, бизнес үшін жасанды кедергілер туындаған.

«Прокурорлық қадағалау актісі бойынша заң бұзушылықтар толық жойылды. Инвесторларға заңсыз өндірілген 1 млн теңге қайтарылды, кінәлі тұлғалар жауапкершілікке тартылды»,  деп толықтырды Бас прокуратура

Оқи отырыңыз:

• Бас прокуратура алаяқтықтың жаңа түрі туралы шұғыл ескерту жасады
• Бұрынғы ректор ҚазҰПУ ғимаратын жалға беріп табыс тапқан – прокуратура нысанды қайтарды
• Бас прокуратура интернет-алаяқтардың шабуылы күшейгенін ескертті