Көпті шулатқан «Қазақанимация» бөлімін Астана қаласына көшіру мәселесі шешілді

2030 жылға қарай қазақстандық фильмдердің кинопрокаттағы үлесі 35%-ға дейін арттырылады, деп хабарлайды Orda.kz Мәдениет және ақпарат министрлігінің баспасөз қызметіне сілтеме жасап.

«2030 жылға қарай отандық фильмдердің кинопрокаттағы үлесі 35%-ға дейін ұлғайтылатын болады. Астанада Мәдениет және ақпарат министрлігі, «Қазақфильм» киностудиясы және Киноны қолдау орталығы өкілдерінің қатысуымен отандық киноиндустрияны дамытуға арналған брифинг өтті» деп жазылған хабарламада. 

Жыл соңына дейін алты киножобаны, соның ішінде анимациялық және деректі фильмдерді шығару жоспарланған.

Мәдениет және ақпарат министрлігінің кинематография басқармасының басшысы Ғани Мұратовтың айтуынша, анимация – мәдени дамудың маңызды бөлігі.

«Қайта жүктеу» шараларының бірі ретінде «Қазақанимация» бөлімін Астана қаласына көшіру туралы шешім қабылданған.

«Баршамызға белгілі, елдегі инновациялық технологияларды енгізу және креативті жобаларды қаржыландыру бойынша ең белсенді үдеріс Астанада жүріп жатыр. Мұнда жыл сайын ТМД-ның гик-мәдениетіне арналған ауқымды Comic Con фестивалі өтеді, Креативті индустриялар қорының ашылуы жоспарланып отыр. Сонымен қатар елордада «Хабар», «Қазақстан» секілді ірі телеарналар, балалар мен жасөспірімдерге арналған контентті дамытып жатқан жалғыз мемлекеттік арна «Балапан» орналасқан. «Қазақанимация» осы инфрақұрылым мен ресурстарды пайдалана отырып, анимация индустриясын дамытуы тиіс», – деп түсіндірді Мұратов. 

Жақында осы студия аумағындағы «Қазақанимация» шығармашылық бірлестігін Астанаға көшіру мәселесі бойынша жанжал шыққан болатын.

Биылғы жылдың наурыз айының соңында  Аида Балаева «Қазақфильмге» қатысты қауесеттердің көбейгеніне қатысты маңызды мәлімдеме жасады.

Ақпан айында Алматыдағы «Қазақфильм» киностудиясының алдында  анимация саласының мамандары жиналып, өз наразылықтарын білдірді.