Көпбалалы әке 11,5 млн теңгені жаңа танысының қолына ұстата салып, алданған

Ақмола облысында  «байланыстары мықты» алаяқ отбасын қомақты қарызға батырды. Ақмола облысындағы көпбалалы отбасы тиімді бизнес ұсынып, лицензия рәсімдеуге көмектесемін деген бейтаныс адамға сеніп, 11,5 млн теңгеден астам қаржысын қолына ұстата салған, деп хабарлайды  Orda.kz.      

Алаяқтық фактісі бойынша қылмыстық іс қозғалды, күдіктіні полиция іздестіріп жатыр.

Құқық қорғау органдарының мәліметінше, оқиға кездейсоқ таныстықтан басталған. Ер адам өзін ықпалды байланыстары бар адам ретінде таныстырып, қысқа уақытта отбасының сеніміне кіріп, бизнес ашуға көмектесуге уәде берген.

Ол көліктерді төмен бағамен сатып алып, пайдамен қайта сату арқылы табыс тауып жүргенін айтқан. Кейін олар байланыс деректерімен алмасып, күдікті өз қызметіне сыйақы сұраған. 

«Қаражат айтарлықтай болғанымен, өтініш беруші жаңа танысының «ықпалына» сеніп, бұған мән бермеген. Біраз уақыттан соң алаяқ лицензия рәсімдеу үшін шұғыл түрде ақша қажет екенін айтып, сондай-ақ көліктерді тиімді сатып алуға инвестиция салуды ұсынған. Жәбірленуші жұбайымен бірге несие рәсімдеп, барлық жинақтарын қосып, барлығы 11 млн теңгеден астам қаржыны берген»,  деп хабарлады Ақмола облысы полиция департаментінің баспасөз қызметі. 

Жеті ай бойы күдікті түрлі сылтаулар айтып, жоба бойынша жұмыс жүріп жатқандай әсер беріп жүре берген. 

Аталған факті бойынша қылмыстық іс қозғалды. Полиция қызметкерлері күдіктінің жеке басын анықтап, оны ұстау үшін қажетті шараларды жүргізіп жатқандарын мәлімдеді.

Оқи отырыңыз:

• Еш жерде жұмыс істемей, жұртты бопсалап, уыс-уыс ақша шашып жүргендер сотталды
• Бекіре балығы мен уылдырығын сатып алғандар да жазаланады
• Танысын балталап өлтіріп, мәйітін кереуеттің астына тығып қойған әйелге үкім шықты