Еш жерде жұмыс істемей, жұртты бопсалап, уыс-уыс ақша шашып жүргендер сотталды

Еш жерде жұмыс істемесе де, көлік жалдау мен ойын-сауыққа ондаған миллион теңге жұмсаған бопсалаушы топ ұсталды, деп хабарлайды Orda.kz.      

Қарағандының Шахтинск қаласынан шыққан жасы 22-ден 34-ке дейінгі он ер адам айыпталушылар орнында отыр. Оларға бопсалау жасады деген айып тағылған. Дау тудырған сот процесі аяқталуға жақын.

Тергеу нұсқасы бойынша, олар жергілікті тұрғындардан ақша бопсалаған. Он ер адамның ешқайсысы ресми түрде жұмыс істемеген. Айыпталушылар ақша табудың түрлі тәсілдерін ойлап тапқан, оның ішінде үркітіп, қорқыту да бар.

Қорқыту арқылы олар адамдарды несие рәсімдеуге мәжбүрлеп, алынған қаражатты өздері иемденіп отырған. Ондаған миллион теңге жалға алынған көліктерге және басқа да ойын-сауыққа жұмсалған.

Жұртты шулатқан ұстау оқиғалары екі жыл бұрын болған, ал қазір сот процесі аяқталуға жақындап қалды. Прокурор әр айыпталушының қылмысының ауырлығына қарай 4 жылдан 12 жылға дейін бас бостандығынан айыру жазасын сұрады.

Айыпталушылар өз кінәларын мойындамай отыр.

«Айыпталушылардың осы эпизод бойынша кінәсі жәбірленушілердің жауап алу және беттестіру кезіндегі айғақтарымен дәлелденеді. Бұл айғақтар сотқа дейінгі тергеу барысында бірізді, қисынды және өзара сәйкес келеді. Өзара қайшылықтар жоқ», – деді мемлекеттік айыптаушы Нұрсұлтан Тамабаев. 

Еске салайық, 2024 жылдың күзінде полиция Шахтинскіде жергілікті тұрғындардан ақша бопсалады деген күдікпен жастар тобын ұстағанын хабарлаған еді.

Оқи отырыңыз:

• Шахтинск кеншілерінің өліміне жауапты адам депутат болды
• Мемлекеттен 6,4 миллион алған қарағандылық  кәсібін жауып тастады
• Танысын балталап өлтіріп, мәйітін кереуеттің астына тығып қойған әйелге үкім шықты