«Қолхат жазып берген»: Шавкат Рахмоновтың әйелі мен ұлы жол апатынан кейін ауруханадан шықты

Жақында жол апатына түскен спортшы Шавкат Рахмоновтың әйелі мен ұлы ауруханадан шықты, деп хабарлайды Orda.kz.

Бұл жөнінде Жамбыл облысының денсаулық сақтау басқармасы мәлімдеді.

«Зардап шеккендер тиісті қолхат жазып, Шудың қалалық ауруханасынан шығып, Алматыға жол жүріп кетті. Олар медициналық мекемеге ешқандай наразылық білдірген жоқ»,  деп нақтылады басқарма.

Бұған дейін Шавкат Рахмоновтың жұбайы мен ұлы жабық бас-ми жарақаты және ми шайқалу диагнозымен травматология бөліміне жатқызылған болатын. Дәрігерлер олардың жағдайын орташа ауыр деп бағалаған.

Жол апаты 27 шілде күні таңғы сағат 08:50-де республикалық маңыздағы Алматы-Екатеринбург автожолының 299-шақырымында болды. Полицияның мәліметінше, Toyota Land Cruiser 200 көлігінің жүргізушісі көлікті басқара алмай, жол талғамайтын көлік аударылып кеткен. Апат салдарынан екі адам қаза тауып, тағы екі адам ауруханаға жеткізілді.

Оқиғаға байланысты полиция ҚР ҚК «Көлік құралдарын басқарған адамдардың жол жүрісі немесе көлік құралдарын пайдалану қағидаларын бұзуы, абайсызда екі немесе одан да көп адамның өліміне әкеп соққан іс-әрекет» бабымен сотқа дейінгі тергеуді бастады. Бұл бап бойынша жүргізуші 5 жылдан 10 жылға дейін бас бостандығынан айырылуы мүмкін.

Әлеуметтік желілерде көлікті Гулайым Рахмонованың өзі басқарғаны, ал жолаушылар арасында оның ұлы мен құрбылары болғаны жөнінде ақпарат тарады.