«Кішкентай әсіреұлтшылдар өсіп келеді»: Қазақша сөйлеген балаға тіл тигізген сатушыға қатысты шара қолданылады

Астанада қазақша сөйлеген алты жасар балаға қоқан-лоқы көрсеткен дүкенде тексеріліс жүргізілді, деп хабарлайды Orda.kz.

Астанада қазақша сөйлеген алты жасар балаға сатушы қоқан-лоқы көрсеткені жайлы журналист Кәмшат Тасболат Facebook-парақшасында жазды. Журналист пен алты жасар қызы Астанадағы Envy дүкеніне велосипед іздеп барған. Қыз сатушыдан велосипед бағасын қазақша айтуды сұраған. Сатушы қазақша сұраған балаға дөрекі жауап қайтарып, «кішкентай әсіреұлтшылдар өсіп келеді» деп сөйлеген.

«Таяқ жейсің! Президенттің айтқанын естімедің бе, сен сияқтыларды жазалайды!» — деген сатушы.

Кейін Facebook парақшасынан жазба жойылып, журналист «Мен бұлардан түңілдім» деген хабарлама қалдырады. Оқырманның «жазбаны неге өшірдіңіз?» деген сұрағына Кәмшат Тасболат «цензура» деп жауап қалдырды.

Астана қалалық Тіл Басқармасының басшысы Сәкен Есіркеп журналиске хабарласып, заң бұзған дүкенге қандай шаралар қолданғанын жеткізді. 

• Дүкеннің маңдайшасы да мемлекеттік тілде ақпарат болмаған соң, алынып тасталды;
• Дүкен ішіндегі кассалық чектерін де мемлекеттік тілге ауыстыру талап етілді.

Тіл басқармасының айыппұл салуға құзыреті болмағандықтан, айыппұл салынбады. Дөрекілік танытқан сатушы кінәсін мойындап, кешірім сұрағысы келген.

«Магнумның курьері мен тапсырыс берушісі сияқты «құшақтасып» табысқым келмеген соң, рахмет дедім, заң талаптарын орындаса да жеткілікті»
 деп жазды журналист.

Еске сала кетейік, қазақта мемлекет болмаған деп Өзбекстандық тарихшы қазақ тарихын жоққа шығарғаны жайлы жазған едік.