Кипр президенті Қазақстанға алғаш рет келеді

Кипр президенті Қазақстанға алғаш рет ресми сапармен келеді. Ол 2 маусым күні Астанаға тікелей рейспен ұшып келеді. Бұл Никос Христодулидистің Қазақстанға жасайтын алғашқы ресми сапары болмақ, деп хабарлайды Orda.kz Кипр үкіметіне сілтеме жасап.

Жоспар бойынша, 3 маусым күні Никос Христодулидис Қазақстан президенті Қасым-Жомарт Тоқаевпен кездеседі. Сондай-ақ делегациялар арасында кеңейтілген келіссөздер өтеді. Қазақстан президенті Христодулидиске мемлекеттік награда — «Достық» орденін табыстайды деп күтілуде.

Тараптар жоғары білім және ғылыми зерттеулер, мәдениет, спорт, ақпараттық-коммуникациялық технологиялар, киберқауіпсіздік және электронды үкімет салаларына қатысты бірнеше меморандумға қол қояды.

Сонымен қатар, Христодулидис Кипр–Қазақстан бизнес-форумында сөз сөйлеп, Alem AI халықаралық жасанды интеллект орталығына барады және Астанада Кипр елшілігін ашады.

Бұдан бөлек, екі ел президенті бұқаралық ақпарат құралдары үшін мәлімдеме жасайды. Ал 4 маусым күні Никос Христодулидис Кипрге қайтып оралады.

Оқи отырыңыз:

• Жетісу облысы тұрғындарының қарсылығынан кейін құны 30 миллиард теңгелік жоба іске аспады
• Қазақстанда бейрезидент тұлғаларға банк шоттарын ашу тәртібі өзгереді