Келісімшартқа қол қойылды: Михаил Шайдоровқа қатысты мәселе қалай шешілді?

Туризм және спорт вице-министрі Серік Жарасбаев мәнерлеп сырғанаушы Михаил Шайдоровтың келісімшартына қатысты қоғамда туындаған дауға түсініктеме берді. Министрлік мәліметінше, спортшының жаңа келісімшартына қол қойылып, барлық қаржылық міндеттемелер толық көлемде орындалады, деп хабарлайды Orda.kz.

Вице-министр Михаил Шайдоровты қазақстандық спорттың мақтанышы деп атап, оның халықаралық аренадағы жетістіктері ел үшін маңызды екенін айтты.

«Михаил Шайдоров – отандық спорттың мақтанышы, өз есімін ел спортының тарихына алтын әріптермен жазған саңлақ. Біз оны әрдайым қолдаймыз және халықаралық аренада табысты өнер көрсетіп, биік жетістіктерге жете беруіне тілектеспіз», – деді Серік Жарасбаев.

Министрлік өкілінің айтуынша, қоғамда кеңінен талқыланған келісімшарт мәселесі бойынша тараптар ортақ келісімге келген.

«Бүгінгі күні келісімшарт Шайдоровтың командасына жолданып, оған қол қойылды. Қол қою рәсімінің барлығы қолданыстағы заңнама талаптарына сәйкес өтті. Тараптар келісімшарттың барлық тармағын жан-жақты талқылады. Құжатқа қол қойылғаннан кейін министрлік оны жұмыс тәртібімен қабылдады», – деді вице-министр.

Жарасбаевтың сөзінше, келісімшартта көзделген барлық төлемдер алдағы уақытта толық көлемде жүргізіледі.

Сондай-ақ министрлік Михаил Шайдоровтың 5 маусым күні жаңа маусымға дайындық үшін АҚШ-қа аттанатынын хабарлады.

Бұдан бөлек, алдағы күндері спортшы өз командасымен бірге Туризм және спорт министрлігіне барып, келесі Олимпиада ойындарына дайындық мәселелерін талқылайды. Кездесу барысында мәнерлеп сырғанауды дамыту және ұлттық құраманың болашақ жоспарлары да қаралады.

Еске салайық, бұған дейін Михаил Шайдоров жалақысының бірнеше айдан бері төленбей жатқанын айтып, келісімшарттағы кейбір тармақтарға қатысты сұрақтар туындағанын мәлімдеген еді.

Оқи отырыңыз:

Шонжыдағы сұмдық: Жоғалған жігіттің мәйіті көміп тастаған жерінен табылды

Жасөспірімді ұрды деген шағымнан кейін Арман Шораевқа іздеу жарияланды