Қазақтың еті, шапаны және жабылатын көшелер: Қазақстан Джей Ло-ның келуіне қалай дайындалып жатыр

Қазақстандағы алдағы концерттер туралы жаңа мәліметтермен «Астана концерт» продюсері Малик Хасенов пен First Media Group басшысы Альфия Нұрғұмарова бөлісті, деп хабарлайды Orda.kz.       

Әлемдік деңгейдегі жұлдыздың концерті 1 тамызда Астанада, 10 тамызда Алматыда өтеді. Ұйымдастырушылар билет бағасы қымбаттатылмағанын айтады. Астанада билеттер үш сағат ішінде сатылып кеткен, тіпті сатылым сайты келушілердің көптігіне шыдамаған. Алматыда алғашқы алты сағатта барлық отыратын орындар сатылып кеткен.

«Егер біз сатылымға шығарғанда билеттердің 90%-ы өтпеген болса, онда баға дұрыс қойылмаған деуге болар еді. Ең алдымен ең қымбат билеттер сатылды», – деді Хасенов.

Билет бағалары 40 мыңнан 180 мың теңгеге дейін болды.

Джей Ло-ның Алматыдағы концерті өтетін Орталық стадионда жеңіл жөндеу жұмыстары жүргізіледі, алайда ауқымды қайта құру жоспары жоқ.

«Шынымды айтсам, Алматы да, «Қайрат» ФК да заманауи стадионға лайық. Біз  көрермендер өз орындарын оңай табуы үшін алдын ала жеңіл-желпі жұмыстар жүргізуді жоспарлап отырмыз. Бірақ айтарлықтай қалпына келтіру жұмыстары болмайды», – деді «Астана концерт» продюсері. 

Дженнифер Лопеспен бірге оның 100-ден астам адамнан тұратын командасы келеді. Олар үшін сахна артында арнайы «жылдам грим бөлмесі» дайындалады – әр екі нөмірден кейін костюм ауыстырылады. Альфия Нұрғұмарованың айтуынша, шоуды ұйымдастыруды Джей Ло командасы өз қолына алады.

«Астана концерт» продюсері әншіге Астана мен Алматыдағы мәдени орындардың тізімін ұсынғанын айтты. Қазір ұйымдастырушылар оның жауабын күтіп отыр. Лопес бірнеше көрікті жерді көргісі келетінін білдірген, бірақ бұл оның келу күніндегі жағдайына байланысты болады. Бұл концерт оның 17-ші туры болады.

«Олар ұлттық тағамның ерекшеліктерімен бөлісуімізді сұрады. Сондықтан дәстүрлі шапан мен суретке түсу мүмкіндігінен бөлек, біз Дженнифер Лопесті қонақжай халық ретінде етке шақырғымыз келеді. Біз оларға толық ұсыныс жасадық, енді нақты нені мақұлдайтынын күтіп отырмыз», – деді продюсер. 

Концерт күні Алматыда бірден үш көше – Байтұрсынов, Сәтбаев және Абай даңғылы жабылады.

Альфия Нұрғұмарова әнші мен оның командасы қала орталығынан алыс, аты әйгілі қонақ үйде тоқтайтынын айтты. Жұлдыздың райдері туралы толық ақпарат жарияланбады.

Бұған дейін Джей Ло концерті  Алматыға қанша пайда әкелетіні белгілі болған еді. Ticketon қызмет көрсету орталығы Дженнифер Лопестің концертіне билет сатқанда сайт істемей, техникалық ақау болды. Осы үшін компания азаматтарға билет ақысын қайтарып, қосымша өтемақы төлеуге уәде беріп, шығынға батты.