Қазақстанның оңтүстігіне әскери дрон құлады

Қорғаныс министрлігі Қазақстанның оңтүстігінде әскери ұшқышсыз ұшу аппаратының құлағанын мәлімдеді, деп хабарлайды  Orda.kz.       

«2 маусым күні ҚР Қарулы Күштері Әуе қорғанысы күштерінің ұшқышсыз ұшу аппараты жоспарлы оқу-жаттығу ұшуын орындау барысында Жамбыл облысы Талас ауданы аумағына штаттан тыс қонды» деп жазылған хабарламада.

Министрліктің мәліметінше, оқиға салдарынан зардап шеккендер мен қираулар жоқ. Халыққа және инфрақұрылым нысандарына қауіп төнбеген.

Оқиғаның барлық мән-жайын анықтау үшін оқиға орнына арнайы комиссия жіберілді. Қазіргі уақытта құлау аумағын тексеру және себептерін анықтау жұмыстары жүргізілуде.

Алдын ала мәлімет бойынша, оқиғаға техникалық ақау себеп болуы мүмкін.

Еске салсақ, Қасым-Жомарт Тоқаев пен Режеп Тайып Ердоған ANKA ұшқышсыз аппараттарын шығаратын бірлескен кәсіпорын құру туралы келісімге қол қойды.  

ANKA — Түркияның Turkish Aerospace Industries компаниясы жасаған барлау, бақылау және соққы жасауға арналған дрон. Ол 2013 жылдан бері қолданыста.Түркия бұл ұшқышсыз аппараттарды Таяу Шығыс, Азия және Африка елдеріне экспорттап келеді.

Оқи отырыңыз:

• Қазақстанда Түріктің барлау жүргізіп, соққы жасайтын «ANKA» дрондары жасалады
• Ұлыбритания, АҚШ және Аустралия суасты дрон бағдарламасын іске қосты
• БАӘ аумағына дрондар шабуыл жасады: Олардың бірі атом электр станциясы маңына түскен