Қазақстанды қоса алғанда ОПЕК+ құрамындағы жеті ел қыркүйекте мұнай өндіруді арттырады

ОПЕК+ ұйымына мүше елдер тәулігіне 188 мың баррельге мұнай өндіру көлемін арттыру туралы келісімге келді. Жаңа көрсеткіштер 2026 жылдың қыркүйек айынан бастап күшіне енеді, деп хабарлайды Orda.kz.       

Қазақстан, Сауд Арабиясы, Ресей, Ирак, Кувейт, Алжир және Оман 2 тамыз күні әлемдік мұнай нарығындағы қазіргі жағдай мен оның даму перспективаларын талқылау үшін онлайн кездесу өткізді.

Қатысушы елдер Ынтымақтастық декларациясын толық сақтауға, соның ішінде қосымша ерікті түзетулерді орындауға берілгендігін тағы да растады. Бұл міндеттемелердің орындалуын Бірлескен министрлік мониторинг комитеті бақылайды.

«Мұнай нарығының тұрақтылығын сақтау үшін қатысушы елдер 2023 жылдың сәуірі мен қарашасында жарияланған қосымша ерікті түзетулер аясында өндіру көлемін тәулігіне 188 мың баррельге өзгерту туралы шешім қабылдады» деп жазылған ОПЕК+ таратқан баспасөз хабарламасында. 

Бұл өзгеріс 2026 жылдың қыркүйек айында жүзеге асырылады. Сонымен қатар ОПЕК+ елдері бұл шара қатысушыларға өтемақылық міндеттемелерін жедел орындауға мүмкіндік беретінін атап өтті.

Бұдан бөлек, елдер 2024 жылдың қаңтарынан бастап белгіленген деңгейден артық өндірілген барлық көлемді толық өтеу ниетін растады.

ОПЕК+ құрамындағы жеті ел нарықтағы жағдайды бағалау үшін ай сайын кездесулер өткізуді жалғастырады. Келесі отырыс 2026 жылдың 6 қыркүйегіне жоспарланған.

Сонымен қатар Бірлескен министрлік мониторинг комитеті энергетикалық инфрақұрылымға жасалған шабуылдарға алаңдаушылық білдірді. Зақымданған нысандарды толық қуатына келтіру көп шығын мен уақытты талап ететіні, бұл өз кезегінде жеткізілім көлеміне әсер ететіні атап өтілді.

«Энергия жеткізілімі қауіпсіздігіне нұқсан келтіретін кез келген әрекет — инфрақұрылымға жасалған шабуылдар немесе халықаралық теңіз бағыттарының бұзылуы — нарықтағы құбылмалылықты күшейтіп, өндірушілер, тұтынушылар және әлемдік экономика мүддесі үшін нарық тұрақтылығын сақтауға бағытталған ортақ күш-жігерді әлсіретеді» деп жазылған хабарламада. 

Бұған дейін Reuters агенттігі үш дереккөзге сілтеме жасап, квоталарды арттыру мүмкіндігі қарастырылып жатқанын және шешім 2 тамызда өтетін ОПЕК+ өкілдерінің кездесуінде қабылдануы ықтимал екенін хабарлаған еді. Сол кезде өндірісті арттыру параметрлері әлі бекітілмеген болатын.

АҚШ пен Иран арасындағы соғыс кейбір қатысушы елдердің нақты өндірісті ұлғайтуына әлі де кедергі келтіріп отыр. Сондықтан квоталардың артуы міндетті түрде жеткізілімнің дәл сол көлемде бірден өсуіне  әкелмеуі мүмкін.

Қақтығыс басталғанға дейін Қытай Еуропа құрлығындағы барлық елдерден де, АҚШ-тан екі есе көп мұнай сатып алып отырған. Бірақ Таяу Шығыстағы соғыс басталғаннан кейін бірнеше апта ішінде ел мұнай импортын күрт қысқартып, соғысқа дейінгі деңгеймен салыстырғанда екі есеге азайтты. Осы тұрғыдағы Қытайдың «мұнай жұмбағы» жайлы мақаланы оқып шықсаңыз болады.

Оқи отырыңыз:

• Қытайдың «мұнай жұмбағы»: Тағы да жұмсақ күш танытпақшы ма?
• «Теңізшевройл» мұнайы тиелген танкер КҚК терминалы маңында шабуылға ұшырады
• Мұнай дағдарысы: жаһан мұнай қыспағына ұшырамаудың жолын қарастырып жатыр