Қазақстанда жылдық инфляция 10,4%-ға жетті

Ұлттық банк жариялаған мәліметке сәйкес, 2026 жылдың мамыр айында Қазақстандағы инфляция айлық есепте 0,7% болды. Бір ай ішінде ақылы қызметтер бағасы 1,1%-ға, азық-түлікке жатпайтын тауарлар 0,6%-ға, ал азық-түлік өнімдері 0,4%-ға қымбаттаған, деп хабарлайды Orda.kz.

Мамырда көкөніс бағасының бір бөлігі арзандады: қияр 25,4%-ға, қызанақ 25,1%-ға, тәтті бұрыш 8,3%-ға төмендеген. Алайда қой еті 4,7%-ға, алма 3,1%-ға, шұжық 1,7%-ға қымбаттады.

Жылдық есепте инфляция деңгейі 10,4%-ды құрады. Ең жоғары өсім азық-түлікке жатпайтын тауарларда тіркелді — 11,7%. Азық-түлік өнімдері 10,7%-ға, ақылы қызметтер 8,7%-ға өскен.

Кейінгі бір жылда көлік қызметтері 11,1%-ға, қонақүй қызметтері 10,3%-ға, білім беру қызметтері 8,9%-ға және мобильді байланыс қызметтері 7,6%-ға қымбаттаған.

Ал кейбір тауарлардың бағасы төмендеді. Мәселен, 2025 жылдың мамырымен салыстырғанда отандық жеңіл автокөліктер 17,9%-ға, азитромицин 6%-ға арзандаған.

Ұлттық статистика бюросы инфляция көрсеткішін есептеу кезінде ел бойынша 537 түрлі тауар мен қызметтің бағасын бақылайды.

Оқи отырыңыз: 

• Әл-Фарабидегі апат: Марқұмдардың туыстары Пакты кешіріп, бас бостандығынан айырмауды өтінді
• Әділетхан Молдахан сотта кінәсін толық мойындады