Қазақстанда зейнетақы есептеу коэффициенті 200%-ға дейін өсті

Үкімет зейнетақы жинақтары жеткіліктілігінің ең төменгі шегін есептеудің жаңа әдістемесін бекітті. Бұл – азаматтар Бірыңғай жинақтаушы зейнетақы қорындағы (БЖЗҚ) шотынан тұрғын үй немесе емделуге қаражат алу үшін шотта қалуы тиіс ең төменгі қаражат, деп хабарлайды Orda.kz.       

Жаңа формулаға шекті мөлшері 200%-ға дейін жететін коэффициенттер енгізілді. Алайда бұл зейнетақы шектері бірден екі есеге өседі дегенді білдірмейді. Аталған коэффициенттер ең төменгі ай сайынғы төлемді есептеу үшін пайдаланылады – ол ең төменгі зейнетақы мен ең төменгі жалақыға байланысты анықталады. Бұл көрсеткіштер бойынша коэффициенттер жыл сайын біртіндеп өседі, бірақ 200%-дан аспайды.

2026 жылы ең төменгі зейнетақыға қатысты коэффициент 75% деңгейінде белгіленді. Кейін ол жыл сайын 10%-ға өсіп отырады, бірақ 200%-дан жоғары болмайды. Ал ең төменгі жалақы үшін бастапқы коэффициент 60% деңгейінде бекітілген. Ол жыл сайын 7,5%-ға артып, сондай-ақ 200% шегінен аспайды.

Мемлекет бұл өзгерістер арқылы зейнетке шыққаннан кейін азаматтардың ай сайынғы төлемдерінің көлемін арттыруды көздейді. Алайда қазіргі таңда жинақтағы қаражаттың бір бөлігін пайдаланғысы келетіндер үшін бұл шектің өсуіне және қолжетімді қаражаттың азаюына әкелуі мүмкін.

Сонымен бірге үкімет жаңа шекті өткен жылғы деңгейден төмендетуге тыйым салды. Ол кем дегенде болжамды инфляция деңгейіне қосымша тағы 5 пайыздық тармаққа ұлғайтылуы тиіс.

Жаңа өзгерістер 6 маусымнан бастап күшіне енеді.

Оқи отырыңыз:

• 2026 жылы Қазақстанда зейнетақы қаншалықты өседі
• Зейнетақы жинақтарын тұрғын үйге пайдалану азайды
• Зейнетақы жинағынан шешіп алатын қаражат жеткізер емес