Қазақстанда Отбасы омбудсмені институты енгізіледі

Мемлекет басшысы Қасым-Жомарт Тоқаев Халықаралық әйелдер күніне арналған салтанатты жиында Қазақстанда Отбасын қорғау мәселелері жөніндегі уәкіл лауазымы енгізілетінін мәлімдеді, деп хабарлайды Orda.kz.      

Президенттің айтуынша, Отбасы омбудсмені президент жанындағы Әйелдер істері және отбасылық-демографиялық саясат жөніндегі ұлттық комиссия төрағасының бірінші орынбасары қызметін атқарады. Сондай-ақ ол атқарылған жұмыстар туралы мемлекет басшысына тұрақты түрде есеп беріп отырады.

«Отбасын қорғау мәселелері жөніндегі уәкілдің қоғамдық лауазымын енгізу адам құқықтарының қорғалуын күшейтіп, отбасы институтын нығайтуға ықпал етеді деп сенемін. Бұл жүйе тұрмыстық зорлық-зомбылықтың алдын алу шараларын кешенді түрде жүзеге асыруға, сондай-ақ отбасы саясаты саласындағы өзге де маңызды мәселелерді шешуге мүмкіндік береді», – деді мемлекет басшысы. 

Еске салсақ, жақында біз Қасым-Жомарт Тоқаев Таяу Шығыстағы жағдайдың өрбуін мұқият қадағалап отырғанын жаздық. 

Таяу Шығыста кезекті шабуылдар өршіді. 2026 жылғы 28 ақпанда Израиль мен АҚШ Тегеран қаласына соққы жасады. Бұған жауап ретінде Иран Таяу Шығыс өңіріндегі АҚШ әскери базаларына және Израильге зымырандар ұшырды.

Оқи отырыңыз:

• Ирандағы елшілік Қазақстан азаматтарын дайын болуға үндеді
• Қасым-Жомарт Тоқаев қауіпсіздік шараларын күшейтуді тапсырды
• ІІМ шетелге барып жұмыс істегісі келетіндерге үндеу жасады