Ирандағы елшілік Қазақстан азаматтарын дайын болуға үндеді

Қазақстанның Ирандағы елшілігі еліміздің азаматтарына ресми үндеу жариялады. Иран аумағында жүрген қазақстандықтарға жеке қауіпсіздік шараларын күшейту ұсынылды.  Ирандағы елшілік Қазақстан азаматтарына «дайын болуға» үндеу жасады, деп хабарлайды Orda.kz. 

Хабарламада Иран аумағынан шығу тәртібі туралы ақпарат берілген.

«Иран әуе кеңістігінің жабылуына және әуе қатынасының уақытша тоқтатылуына байланысты, Иран аумағынан Әзірбайжан, Армения, Түркия және Түрікменстан бағытындағы құрлық шекаралары арқылы шығу мәселесін пысықтау үшін Қазақстан Республикасы дипломатиялық өкілдіктерімен байланысқа шығуларыңызды сұраймыз» деп жазылған шұғыл хабарламада.

Осыған байланысты СІМ төмендегі ұсынымдарды қатаң сақтауды сұрады:

•  адам көп жиналатын орындарға барудан және бұқаралық іс-шараларға қатысудан бас тарту;
•  жергілікті билік органдары мен ресми ақпарат көздерінің хабарламаларын тұрақты түрде қадағалау;
•  қажетсіз сапарларды шектеу;
•  жеке құжаттарды әрдайым өзіңізбен бірге алып жүру;
•  туындауы мүмкін төтенше жағдайларға дайын болу;
•  Қазақстан Республикасының дипломатиялық өкілдіктерімен тұрақты байланыста болу.

Министрлік мәліметінше, Қазақстанның  Иран Ислам Республикасындағы Елшілігі Иран аумағында жүрген Қазақстан азаматтары үшін тәулік бойы жұмыс істейтін жедел байланыс желілерін іске қосқан.

Қасым-Жомарт Тоқаев Біріккен Араб Әмірліктері, Сауд Арабиясы, Катар, Бахрейн және Кувейт мемлекеттерінің басшыларына жеке жолдаулар жолдап, осы елдердің халықтарына ауыр сын-қатер кезеңінде шынайы қолдау мен ынтымақтастық білдірді.

Оқи отырыңыз:

• Тоқаев өңірдегі шиеленіске қатысты Парсы шығанағы елдері көшбасшыларына жолдау арнады
• Мемлекет басшысы Қасым-Жомарт Тоқаев Қазақстан халқын Алғыс айту күнімен құттықтады
• Air Astana 4 наурызға дейін Таяу Шығыс елдеріне барлық тұрақты рейстерін тоқтатты