Қазақстанда алғаш рет жасөспірімге жүрек трансплантациясы жасалды

28 наурызға қараған түні елордадағы клиника дәрігерлері 15 жастағы жасөспірімге сәтті ота жасады. Бала 10 жасынан бері ауыр дертке шалдыққан, деп хабарлайды Orda.kz. 

Ми жұмысының тоқтауы диагнозы қойылған 43 жастағы ер адамның жүрегі жасөспірімнің өмірін сақтап қалды. Диагноз расталғаннан кейін оның туыстары мәйіттік донорлыққа келісім берген. 

Қазіргі таңда науқастың жағдайы қанағаттанарлық. Ол жансақтау бөлімінен отадан кейінгі бөлімге ауыстырылған.

Қазақстанда қазіргі уақытта түрлі ағзаларды ауыстыру кезегінде 123 кәмелетке толмаған науқас тұр. Оның ішінде 9 балаға жүрек трансплантациясы қажет.

Денсаулық сақтау министрі Ақмарал Әлназарова отадан кейін жасөспірім мен оның анасына арнайы барды. Сонымен қатар, ота жасаған медициналық топқа атқарған жұмыстары үшін алғыс білдірді.

Оқи отырыңыз:

• Елімізде 400-ден аса жеке емшара кабинеті лицензиясыз қызмет көрсеткен
• Алматы облысында автобус пойызбен соқтығысты: зардап шеккендердің жағдайы қандай?