Қазақстан Өзбекстан малын бордақылау алаңына айнала ма?

Өзбекстан Қазақстан аумағында мал шаруашылығы бойынша бірлескен өнеркәсіптік жобаны іске қосуды ұсынды. Жоба аясында мал бордақылау үшін 50 мың гектарға дейін жер бөлу қарастырылып отыр, деп хабарлайды Orda.kz.        

Бұл бастаманы Өзбекстанның Сауда-өнеркәсіп палатасының төрағасы Даврон Вахабов өзбек-қазақстандық бизнес-форумда мәлімдеді.

Жоспарға сәйкес, өзбекстандық инвесторлар мал төлін өздері сатып алып, жемшөп базасын қалыптастырып, малды Қазақстан аумағында бордақылай алады. Малдың салмағы 400 келіден асқаннан кейін, оны Өзбекстанға экспорттау көзделген. Осылайша өндірістік процестің едәуір бөлігі Қазақстанда жүзеге асырылады.

Өзбекстанның бұл жобаға қызығушылығы елдегі етке деген сұраныстың артуына қатысты. Қазіргі таңда жыл сайынғы қажеттілік 2,15 млн тонна болса, ішкі өндіріс шамамен 1,6 млн тонна деңгейінде. Тапшылық импорт есебінен жабылады, ал географиялық жақындығы мен қалыптасқан сауда-логистикалық байланыс арқасында Қазақстан негізгі жеткізушілердің біріне айналған.

2025 жылы Қазақстан Өзбекстанға 32 мың тонна сиыр еті мен 34 мың тонна қой етін экспорттап, жалпы көлемі шамамен 300 млн доллар болды. Жалпы еліміздің ет экспортының 90%-дан астамы Өзбекстан нарығына тиесілі.

Жоба жүзеге асқан жағдайда, Қазақстанның агроөнеркәсіптік кешеніне ұзақ мерзімді инвестиция тартылып, өңірлік нарық үшін ет өндірісі ұлғаюы мүмкін. Алайда әзірге бұл тек бастама деңгейінде, екі жақ талқылауды жалғастыруға келісті, ал шаруашылықты орналастыру, жер бөлу шарттары мен инвесторларды тарту тәртібі әлі нақтыланған жоқ.

Оқи отырыңыз:

• Ауыл бағдарламасы: малшылар ерте зейнетке шығып, балалары тегін оқып, әскери қызметтен босатылады
• Қосымша қолдау жүйесі бар: Грантқа ілінбегендер не істейді?
• Мүфтият мәһрдің ең төменгі мөлшерін түсіндірді