Қазақстан мен Қырғызстан шекарасында жүздеген жүк көлігі жиналды: Не болып жатыр?

Жамбыл облысындағы «Қарасу» автомобиль өткізу бекетінде Қырғызстан бағытына қарай бет алған шамамен 400 жүк көлігі жиналып қалды, деп хабарлайды  Orda.kz.      

Бұл туралы Қазақстан Республикасы Қаржы министрлігі Мемлекеттік кірістер комитетінің баспасөз қызметі хабарлады.

Ведомствоның түсіндіруінше, көлік ағынының артуы уақытша мерзімдік сипатта. Жүк көліктерінің жиналуына халықаралық жүк тасымалының маусымдық өсуі және Қырғызстанда жүк көліктерінің қозғалысына енгізілген температуралық шектеулер әсер еткен.

«Мемлекеттік кірістер комитеті мүдделі мемлекеттік органдармен бірлесіп, жағдайды тұрақтандыру және өткізу бекетінің өткізу қабілетін арттыру бойынша шаралар қабылдап жатыр. Осы мақсатта өткізу бекетіндегі жұмыс күшейтілді. Ішкі істер органдарымен бірлесіп көлік ағыны реттеліп, оның бір бөлігі жақын маңдағы басқа өткізу бекеттеріне бағытталуда» деп жазылған баспасөз хабарламасында. 

Қазақстан жағдайды бағалап, алдағы шараларды келісу үшін Қырғызстанның тиісті органдарымен өзара байланыс орнатқан.

Тасымалдаушылар мен жүргізушілер үшін мессенджерлерде арнайы ақпараттық арна жұмыс істейді. Онда өткізу бекеттеріндегі жағдай және болуы мүмкін балама бағыттар туралы өзекті ақпарат жарияланып отырады. Сонымен қатар өткізу бекетіне жетпей тұрып жүргізушілерге түсіндіру жұмыстары жүргізілуде.

Мемлекеттік кірістер комитеті тасымалдаушыларды маршруттарды жоспарлау кезінде қазіргі жағдайды ескеруге шақырды.

Оқи отырыңыз:

• Бірінші сыныпқа 380 мың оқушы барады: Мектептер оларды қабылдауға дайын ба?
• Алматыда самокат мінген ер адам бордюрге соғылып, қаза тапты