Алматыда самокат мінген ер адам бордюрге соғылып, қаза тапты

Алматыда кеше түнгі уақытта электр самокат мінген ер адам бордюрге соғылып, алған жарақатынан қаза болды. Бұл туралы Orda.kz қалалық полиция департаментіне сілтеме жасап хабарлайды.

Жол-көлік оқиғасы Варламов көшесінде, Төле би көшесіне жақын жерде болған.

Алдын ала мәлімет бойынша, 44 жастағы Алматы тұрғыны электр самокатпен келе жатып, көлік құралын басқара алмай қалған. Ол бордюрге соғылып, құлап түскен.

Қатты құлаған ер адам өміріне қауіпті ауыр жарақат алған.

«Оқиға орнына дәрігерлер дереу жетті. Көрсетілген медициналық көмек пен жүргізілген реанимациялық шараларға қарамастан, зардап шеккен адамды құтқару мүмкін болмады»,  деп хабарлады полиция. 

Алдын ала ақпарат бойынша, ер адам шлем және басқа да жеке қорғаныс құралдарын пайдаланбаған.

Қазір оқиғаның барлық мән-жайы анықталып жатыр. Полиция оқиғаның нақты себептерін анықтау бойынша тиісті жұмыстар жүргізуде.

Еске салсақ, 25 тамыздан бастап Қазақстанда электрсамокаттардың тротуарлар мен жаяу жүргіншілер жолымен жүруіне тыйым салынды.

Енді велосипед жолы немесе велосипед жолағы бар болса, электрсамокатпен тек солар арқылы жүру керек. Ал мұндай жолдар болмаған жағдайда самокатпен жолдың оң жақ шетімен немесе жол жиегімен қозғалуға рұқсат етіледі.

Оқи отырыңыз:

• Қазақстанда электрсамокатшыларға заң күшейді: Енді тротуарда жүруге болмайды
• Самокат мінетіндерге қатысты нақты шаралар қабылданады
• Үкіметте тротуармен жүретін самокатшылардың мәселесін шешу тапсырылды