Қазақстан Қырғызстаннан жерді 49 жылға не үшін жалға алмақшы?

Сенат депутаттары Қазақстан мен Қырғызстан арасындағы жерді 49 жыл мерзімге жалға алу туралы келісім мен шартты ратификациялады, деп хабарлайды Orda.kz.

Келісімге сәйкес, Қазақстан Ыстықкөл облысында орналасқан курорттық нысандарға меншік құқығын сақтай отырып, оларды жаңғырту міндетін 2029 жылдың соңына дейін орындайды. Атап айтқанда, нысандар 3–4 жұлдызды жыл бойы жұмыс істейтін қонақүй деңгейіне жеткізілуі керек. Айта кетейік, ол аумақта тек бір ғана нысан – Дінмұхамед Қонаевтың №1 саяжайы ғана бұзылмай, мұражайға айналады. Бұл келісімге екі ел 2006 жылғы 4 шілдеде қол қойған еді.

Құжат Қазақстанға аталған аумаққа инвестор тартуға мүмкіндік береді. Қазақстанның меншігі ретінде төрт нысан бекітілген: «Қазақстан» санаторийі, «Самал» демалыс үйі, «Университет» спорттық-сауықтыру лагері және «Олимп» спорттық-сауықтыру орталығы.

Қазіргі уақытта Президент Іс басқармасы Ыстықкөл жағалауында жаңа «Қазақстан» санаторийі құрылысын жүргізіп жатыр. Нысанды 2026 жылдың төртінші тоқсанында пайдалануға беру жоспарланған. Жоба аясында аумақтағы барлық ғимараттар сүріледі. 

Еске сала кетейік, 2009 жылғы 1 желтоқсанда жасалған үкіметаралық шарт бойынша Қазақстанға Ыстықкөл аумағындағы жалпы 58,8 гектар жер 49 жылға уақытша ақылы пайдалануға берілген. Ал қырғыз тарабы құжатқа сай, жалға берілген нысандардың қолсұғылмауына кепілдік береді және оларды мемлекет меншігіне қайтарып алу әрекетін жасамауға міндеттенеді.

Oқи отырыңыз:

• Қырғыз президентінің саяси серіктесі Ташиев бүкіл қызметінен босатылды
• Садыр Жапаров Конституциялық сотқа жүгінді
• Қазақстан-Қырғызстан шекарасында не болып жатыр?