Елімізде жаңа Конституция күшіне енді: Жаңа дәуірдің бастауы

Қасым-Жомарт Тоқаев қазақстандықтарды ел тарихындағы маңызды оқиғамен – жаңа Конституцияның күшіне енуімен құттықтады. Мемлекет басшысы бұл күнді тәуелсіз Қазақстан тарихындағы жаңа дәуірдің басталуы деп атады, деп хабарлайды Orda.kz.

Президенттің айтуынша, 1 шілдеден бастап күшіне енген жаңа Конституция елдің саяси жүйесін түбегейлі қайта құруды, мемлекеттік және азаматтық қоғам институттарын жаңғыртуды көздейді. Бұл – Қазақстанның даму бағытын жаңа арнаға бұратын ауқымды реформалардың бастауы.

Жаңа Ата заң 2026 жылғы 15 наурызда өткен жалпыұлттық референдум нәтижесінде қабылданды. Осыған байланысты 15 наурыз ресми түрде мемлекеттік мереке – Конституция күні болып жарияланды. Бұған дейін елде 1995 жылғы Конституция қолданылып келген еді.

Қасым-Жомарт Тоқаев Конституция күнінің «Наурызнама» онкүндігімен тұспа-тұс келуінің символдық мәні зор екенін атап өтті.

«Бұл атаулы күн көктемгі жаңару дәстүрлерін жаңа Конституцияның негізгі қағидаттарымен үйлестіреді. Яғни, азаматтық бірлікке, білімге және Отан игілігі үшін адал еңбек етуге ұмтылысты білдіреді», – деді президент. 

Мемлекет басшысы өз үндеуінде жаңа Конституцияның құқықтық негізі елдің барлық мақсаттарына жетуге мүмкіндік беретініне сенім білдірді.

Оның айтуынша, жаңа кезеңде қоғамда заң мен тәртіп, еңбексүйгіштік, тазалық және табиғатқа жанашырлық сияқты негізгі құндылықтар орнығуы тиіс.

Президент Қазақстан халқының референдум барысында жоғары жауапкершілік танытқанын ерекше атап өтті. Миллиондаған азамат ел болашағына бейжай қарамай, тарихи таңдау жасаған.

Сарапшылардың пікірінше, жаңа Конституцияның күшіне енуі билік жүйесінің жаңаруына тікелей әсер етеді.

Жаңа Конституция – Қазақстанның ұзақ мерзімді дамуына бағытталған стратегиялық құжат. Ол елдің саяси тұрақтылығын нығайтып, экономикалық өсімге және әлеуметтік әділеттілікке негіз қалайды.

«Жаңа Конституциямыздың заңды күшіне енуі – бүкіл еліміз үшін айрықша маңызды оқиға. Баршаңызды шын жүректен құттықтаймын!
Бүгін тәуелсіз Қазақстан тарихының жаңа дәуірі басталады. Біз саяси-экономикалық реформалардың, ауқымды өзгерістердің және қарқынды дамудың даңғыл жолына түсеміз»,— деді президент. 

Қасым-Жомарт Тоқаевтың айтуынша, бірлігі бекем халық қана үлкен жетістіктерге жете алады. Сондықтан жаңа кезеңде басты мақсат – барша азаматқа тең мүмкіндік беретін Әділетті Қазақстанды құру.

Оқи отырыңыз:

• Тарихи өзгеріс: Қос палатаның соңғы отырысы
• 2026 жылғы 1 шілдеде бірден алты лауазымды тұлға тағайындалады
• Құрылтай — жаңа формат: Президент Құрылтай сайлауы мен оның маңызына тоқталды