Қазақстан 2026 жылғы Қысқы Олимпиада ойындарының медальдық есебінде 15-орында

Мәнерлеп сырғанаудан Михаил Шайдоров Олимпиада чемпионы атанғаннан кейін 2026 жылғы Қысқы Олимпиада ойындарының бейресми жалпыкомандалық есебінде Қазақстан құрамасының орны белгілі болды, деп хабарлайды Orda.kz.

Жетінші жарыс күнінің қорытындысы бойынша жүлде алған елдер кестесінде Қазақстан құрамасы 15-орынға жайғасып, бұл орынды Ұлыбритания құрамасымен бөлісті. Қазақстаннан бір саты жоғары, 14-орында Словения құрамасы тұрса, 16-орында Канада құрамасы орналасқан.

Айта кетейік, Қазақстан 2026 жылғы Қысқы Олимпиадада алтын медаль жеңіп алған он бесінші ел атанды. Жалпы жетінші жарыс күнінен кейін Ақ Олимпиада жүлдесін 24 елдің спортшылары иеленді.

Еске салсақ, Михаил Шайдоров ерлер арасындағы жеке мәнерлеп сырғанаудан Олимпиада чемпионы атанды. Бұл Қазақстан үшін 1994 жылғы Қысқы Олимпиададан кейінгі алғашқы алтын медаль.

Сонымен Қазақстан тарихында тұңғыш рет мәнерлеп сырғанаудан Олимпиада чемпионы шықты. Бұған дейін бұл спорт түрінен ел қоржынына 2014 жылы Денис Тен қола медаль салған еді.

Оқи отырыңыз: 

• Азия чемпионаты–2026: Ел қоржынына жеңіл атлетикадан алғашқы медаль түсті
• Милан Олимпиадасының спорттық сайыстары басталды