Қарағандыда жалған купюрамен сауда жасаған әйел ұсталды

Қарағанды облысында киім дүкенінде 10 мың теңгелік жалған купюрамен сауда жасаған әйел ұсталды, деп хабарлайды Orda.kz.

Қарағанды облысының Абай қаласында жалған ақша қолдану дерегі тіркелді. Оқиға киім сататын бутиктердің бірінде болған екен. Келіншек сауда жасап, жалған ақшаны сатушыға бергенде  бейнекамераға түсіп қалған. Сонымен қатар, әйел 10 мың теңгеден  қайтарым ақшасын да алыпты.

Полиция мәліметінше, күдікті әйел сатып алған тауары үшін 10 мың теңгелік купюрамен есеп айырысқан. Сатушы қайтарым ақшасын бергеннен кейін, әйел дүкеннен шығып кеткен. Алайда көп ұзамай 70 жастағы сатушы купюраның жалған екенін байқайды. Алдымен бейнебақылаудағы жазбаны әлеуметтік желіге таратып, артынша полицияға жүгінген.

«Аталған факті бойынша «Алаяқтық» бабы негізінде қылмыстық іс қозғалды. Жедел іздестіру шаралары барысында 38 жастағы күдікті ұсталды. Алдын ала мәліметке сәйкес, әйелдің сыбайластары болуы мүмкін. Қазіргі уақытта оның басқа да ұқсас құқық бұзушылықтарға қатысы бар-жоғы тексеріліп жатыр», — деп мәлімдеді ПД.

Оқи отырыңыз:

Тоқаевтың экс-кеңесшісін өлтірген адам 11 жылға сотталды

Нұрай Серікбайдың өлімі: Сараптама айыпталушыны есі дұрыс деп таныды

Қаңғыбас иттер туралы даулы заң мәжіліске қайтарыла ма?