Қаңғыбас иттер туралы даулы заң мәжіліске қайтарыла ма?

Депутаттар заң жобасын түзету үшін мәжіліске қайтаруды ұсынып отыр. Негізгі өзгеріс — иттерді 5 күннен кейін эвтаназиялау туралы бірыңғай қатаң нормадан бас тарту, деп хабарлайды Orda.kz.

Қаңғыбас жануарлар туралы заң сенатта қызу талқыланып жатыр. Құжат бірнеше рет қаралып, қоғамнан, белсенділер мен сарапшылардан жүздеген ұсыныс түскен. Соның нәтижесінде сенаторлар заң жобасын кері қайтарып, қайта пысықтауды ұсынды.

Басты даулы норма — жануарларды уақытша баспанада бес күн ұстағаннан кейін эвтаназия жасау туралы талап. Сенаторлар бұл тәсілді тым қатаң деп санап, одан бас тартуды немесе жұмсартуды ұсынып отыр.

Жаңа ұсыныс бойынша, қаңғыбас жануарлардың санын реттеу әр өңірдің құзыретіне берілуі мүмкін. Яғни нақты механизмдерді маслихат өздері бекітеді. Бұл бірыңғай тәсілден бас тартып, аймақтық ерекшеліктерді ескеруге мүмкіндік береді.

Сонымен қатар заң мәтінінен «эвтаназия» терминін алып тастау ұсынылды. Оның орнына неғұрлым жұмсақ немесе бейтарап тұжырым қолданылуы мүмкін. Тағы бір маңызды мәселе — «қаңғыбас жануар» ұғымын нақтылау. Себебі қазіргі редакцияда бұл анықтама түрлі түсіндірмеге жол беріп отыр.

Заң жобасының түпкілікті нұсқасы мәжіліске қайта жіберілгеннен кейін ғана белгілі болады. 

Оқи отырыңыз:

• Қырғызстанда Қамшыбек Тәшиевке екі бап бойынша айып тағылды
• Қаңғыбас иттерді өлтіруге рұқсат берілді
• Парижге жаяу барған 76 жастағы қария «Құрметті спорт қызметкері» атағын алды