Kanye West концерті Алматыға 5 млрд теңге пайда әкелді

15 тамызда Алматыда өткен Kanye West (YE) концертіне әлемнің 50-ден астам елінен шамамен 7 700 турист келген. Шетелдік қонақтардың қала экономикасына қосқан үлесі шамамен 5 млрд теңге болды, деп хабарлайды Orda.kz.

Концертке келген туристер арасында әртістің шетелдегі 2 мыңға жуық жанкүйері бар. Олардың кейбірі әлемдік тур аясындағы бірнеше концертке қатысқан. Шетелдік туристердің көпшілігі Ресей, Қырғызстан, Өзбекстан, БАӘ, АҚШ, Қытай, Ұлыбритания, Германия және Аустралиядан келген.

Туристердің көптеп келуі Алматыдағы қонақүйлер, қоғамдық көлік, мейрамханалар мен басқа да қызмет түрлеріне сұранысты арттырған. 13–16 тамыз аралығында қаладағы орналастыру орындарының орташа толымдылығы 98 пайызға жуықтаған.

Алматы қаласы Туризм басқармасының басшысы Ғалия Тоқсейітованың айтуынша, YE концерті биылғы іс-шаралық туризмдегі ең ірі оқиғалардың біріне айналған.

«Бұл — ірі халықаралық іс-шараны қабылдау ғана емес, Алматыны халықаралық аудиторияға таныстырудың да мүмкіндігі. Концерт кезіндегі туристік қызметтерге жоғары сұраныс іс-шаралық туризмнің әлеуетін және оның қала экономикасын дамытудағы маңызын көрсетті», — деді Тоқсейітова.

Оқи отырыңыз:

Қазақстандықтар Кореяға EPS арқылы қалай жұмысқа орналаса алады? Министірлік талаптарды түсіндірді

Бас прокуратура Құрылтай сайлауында заң талаптарын сақтауға қатысты үндеу жасады