Ақтаудағы автомобильге газ құю бекетінде ұзын-сонар кезек

Ақтауда жүргізушілер қаладағы автогаз құю бекетінде  сұйытылған газ жеткізілімінде іркілістер бар екенін мәлімдеді, деп хабарлайды Orda.kz  Lada.kz-ке сілтеме жасап.

Басылым журналистері Ақтаудағы бірнеше автогаз құю бекетін аралап, жанармай құю бекеттерінде жүргізушілердің көліктеріне газ құю үшін ұзақ кезекте тұруға мәжбүр екенін анықтаған.

Жүргізушілердің айтуынша, кейбір жанармай бекеттері уақытша жұмыс істемейді. Ондай орындарда «Газ жоқ» деген жазуы бар тақтайшалар ілінген. Ал газ сатылып жатқан станцияларда кезек көбейген.

«Неліктен біздің өңірде әр жаз сайын сұйытылған газ тапшылығы туындайды? Неге билік маусымдық сұраныстың артатынын ескермей, жеткізілім көлемін көбейтпейді? Бүгін газ құю үшін бір сағаттан астам кезекте тұрдым. Мұндай аптап ыстықта бұл өте қиын», – деп шағымданды көлік иелерінің бірі. 

Маңғыстау облыстық кәсіпкерлік және сауда басқармасы 26 маусымда өңірде газ тапшылығы жоқ екенін мәлімдеді. Олардың айтуынша, кезек тек қалалар мен аудандардың орталық көшелерінде орналасқан жекелеген бекеттерде ғана байқалады.

Ведомство дерегінше, Маңғыстау облысында 185 487 автокөлік тіркелген, оның 103 918-і газбен жүретін құрылғылармен жабдықталған. Соңғы үш жылда өңірге Грузияның транзиттік нөмірімен 22 354 автокөлік әкелінген, олардың көпшілігі де сұйытылған газды пайдаланады.

Басқарма өкілдері ай сайын Маңғыстау облысына 18 мың тонна сұйытылған мұнай газы бөлінетінін атап өтті. Бұл – Қазақстан өңірлері арасындағы ең жоғары көрсеткіш. Салыстыру үшін, басқа облыстарға 11 мың тонна немесе одан да аз көлемде газ жеткізіледі.

Энергетика министрі Ерлан Ақкенженов Қарашығанақ кен орнында мұнай өндіру көлемі шамамен үштен бірге қысқарғанын, алайда бұл ел ішіндегі газ жеткізілімдеріне әсер етпегенін мәлімдеген болатын.

Бұған дейін Орынбор газ өңдеу зауытына жасалған шабуыл туралы ақпараттан кейін сарапшылар мен салалық арналар Қарашығанақтың осы зауытқа тәуелділігі туралы мәселе көтерген еді. Алайда Энергетика министрлігі бұл болжамдарды жоққа шығарды.

Оқи отырыңыз:

• Алматы – Ташкент жолында мотор майын тасымалдаған жүк көлігі аударылып, өртенді
• Елімізде бұқаралық ақпарат құралдары қызметкерлерінің күні
• Алматыда курьер тыйым салынған вейп тасып жүргенін білмеген