АҚШ Иран уранын қолға түсіру үшін күрделі операция дайындап жатыр – БАҚ

АҚШ арнайы қызметтері Иранның жақсы қорғалған ядролық нысандарындағы байытылған уранды қолға түсіруге бағытталған «әскери тарихтағы ең күрделі операцияны» әзірлеуде, деп хабарлайды Orda.kz New York Post басылымына сілтеме жасап.

Америкалық шенеуніктердің бірі басылымға берген мәлімдемесінде «жақын уақытта келіссөздер алға жылжымайды» деп, жалғыз жол қарулы әрекет болуы мүмкін екенін айтқан.

«Мұны айту маған ыңғайсыз, бірақ Иранның ядролық материалдарынан, кем дегенде қазіргі қолында барынан құтылудың ең ықтимал жолы – әскери операция. Себебі жақын уақытта келіссөздер нәтижеге жеткізбейді», – деді Стратегиялық және халықаралық зерттеулер орталығы директорының орынбасары Джозеф Роджерс.

Өте күрделі операцияға мыңдаған құрлық әскерінің қатысуымен ирандық ядролық нысандарға шабуыл жасау, миналанған тұзақтарды қолдану, құрылыс бригадаларын тарту және нысандар айналасында ірі қорғаныс аймағын қалыптастыру кіреді.

Бұл туралы жұма күні әскери жоспарлаудан хабардар дереккөз мәлімдеген. Сарапшының айтуынша, байытылған уранды Ираннан шығару бойынша арнайы жасақ операциясы «әскери тарихтағы ең күрделі операцияға» айналуы мүмкін.

БАҚ деректеріне сәйкес, ықтимал араласуға дайындық барысында Ирандағы ядролық нысандардағы миналанған туннельдер де ескерілуде. Жоспар бойынша байытылған уран Фордо нысанындағы айтарлықтай қираған ғимараттардан және Исфахандағы қатты зақымданған нысаннан шығарылуы тиіс. Арнайы жасақтың шағын тобы үйінділерді аршып, уранды алып шығумен айналысады, бұл «аса қауіпті» процесс деп бағалануда.

«Бұл қарсылас жағдайында жүзеге асатын күрделі әрі логистикалық тұрғыдан қиын операция болар еді. Иран әскері айтарлықтай әлсірегенімен, Мадуроны қорғаған кубалықтардан гөрі жақсырақ дайындалған», – деді Джозеф Роджерс. 

Басылым жазуынша, Иран да мұндай сценарийге дайындалып жатыр. Соңғы апталарда Исфахандағы қашықта орналасқан әрі жақсы қорғалған ядролық нысан тұзақтармен жабдықталған. CNN арнасының өткен айдағы мәліметіне сәйкес, Иран ықтимал шабуылға дайындалып, Исфахан нысанының туннельдеріне миналар мен жарылғыш заттарды орналастырған.

Пикакс тауы Натанздағы уран байыту алаңына жүздеген ядролық центрифугалардың көшірілгені туралы хабарлардан кейін жаңа нысана ретінде аталды. 2025 жылы Халықаралық атом энергиясы агенттігі Иранда 9 тоннадан астам байытылған уран бар екенін мәлімдеген.

Бұған дейін АҚШ президенті Дональд Трамп Иранға жасалатын соққыларды тоқтату туралы бұйрық берген болатын.

Оқи отырыңыз:

• АҚШ пен Сауд Арабиясы арасындағы ядролық келісім неге дауға айналды?
• Тоқаев соғысты «мұздатуды» ұсынды: Президенттің Омбыдағы мәлімдемесі нені аңғартады?