Иран Израильдің шабуылынан кейін АҚШ-пен ядролық бағдарлама тұрғысындағы келіссөздердің «мәні жоқ» деп мәлімдеді

Иран Вашингтонды Израильдің әскери шабуылын қолдады деп айыптады және АҚШ-пен Тегеранның ядролық бағдарламасына қатысты диалогтың енді «мәнсіз» екенін мәлімдеді, деп хабарлайды Orda.kz Jerusalem Post-қа сілтеме жасап.

Екінші тарап (АҚШ) өзін диалог мағынасыз болатынын білгендей ұстады. Сионистік режимге (Израильге) Иран аумағына соққы жасауға мүмкіндік бере отырып, келіссөздерге дайын екенін мәлімдеуге және рөлдерін бөлісуге болмайды, деп жазды Иран СІМ өкілі Эсмаил Багаи Хамане.

Ол Израиль дипломатиялық үдеріске «ықпал ете алғанын» және Израиль шабуылы Вашингтонның мақұлдауынсыз болмайтынын айтты.

Jerusalem Post хабарлағандай, АҚШ пен Иран арасындағы келіссөздердің алтыншы раунды жексенбі күні Маскатта (Оман) өтуі тиіс еді, бірақ израильдік тараптың соққысынан кейін кездесудің өтетіні беймәлім. 

Иран өзінің уранды байыту бағдарламасы тек азаматтық сипатта екенін айтып, Израильдің ядролық қаруды жасырын әзірлеу туралы айыптауын жоққа шығарады.

АҚШ президенті Дональд Трамп Рейтер агенттігіне Израильдің алдағы шабуылдарын өзі және оның командасы білетінін, бірақ соған қарамастан әлі де болса келісім жасау мүмкіндігін көріп отырғанын айтты.

Кеше кешке Иран қарулы күштері Израиль аумағындағы ондаған нысанаға шабуыл жасады. Тель-Авивте және оның төңірегіндегі елді мекендерге зымырандар құлады.

Иранның Жоғарғы көшбасшысы аятолла Әли Хаменеи Израиль өзінің шабуылымен «соғыс бастағанын» және бұдан кейін оның «зақымсыз қалуына» жол берілмейтінін мәлімдеді.

13 маусымда Израильдің Қорғаныс армиясы (ЦАХАЛ) 200-ден астам ұшақ пен 330-дан астам оқ-дәрілерді қолданып, Ирандағы 100-ден астам нысанға, соның ішінде ядролық нысандарға соққы  бергенін мәлімдеді. Кеше ғана Иран Жамқаран мешітінің үстіне қып-қызыл «кек туын» көтерді.

Қауіптің шиеленіскеніне орай  Қазақстан СІМ Таяу Шығыстағы жағдайға қатысты мәлімдеме жасады.