Иракта экс-шенеуніктің үйінен су бөтелкелеріне жасырылған 20 миллион доллар табылды

Иракта жемқорлыққа қатысты тергеу барысында бұрынғы мұнай министрі орынбасарының үйінен су бөтелкелеріне жасырылған шамамен 20 миллион доллар қолма-қол ақша мен 5 келі алтын тәркіленді, деп хабарлайды Orda.kz.

Шетелдік БАҚ-тың мәліметінше, Ирак билігі бұрынғы мұнай министрінің орынбасары Абдулла әл-Жумайлидің үйін тінту кезінде пластик су бөтелкелеріне жасырылған шамамен 20 миллион АҚШ доллары мен 5 келі алтын тапты.  

Тәркілеу жемқорлық және мемлекеттік жобаларға бөлінген қаражатты жымқыру дерегі бойынша жүргізіліп жатқан тергеу аясында жүзеге асқан. Соңғы тінтуден кейін тәркіленген активтердің жалпы құны 120 миллион долларға жеткен.

Қолма-қол ақшадан бөлек, тергеушілер бірнеше жылжымайтын мүлік нысанын, автокөліктерді және алтын әшекейлерді де тәркілеген. Әл-Жумайли биыл маусым айында мұнай өңдеу зауыттарының құрылысына қатысты келісімшарттар жасау кезінде жемқорлыққа жол берді деген күдікпен ұсталған.

Бұл іс Ирак премьер-министрі Мұхаммед әл-Заиди жариялаған ауқымды сыбайлас жемқорлыққа қарсы науқан аясында тергеліп жатыр. Бұған дейін осы науқан барысында ондаған шенеунік пен депутат қамауға алынған.

Оқи отырыңыз:

ХАМАС 20 жылдық биліктен бас тартуға дайын: Бұл не білдіреді?

Мемлекеттік Туды енді киімге жапсыруға тыйым салынады