Индонезияда жаппай наразылық: митингке шыққандар шенеуніктердің резиденцияларына басып кірді

Индонезияда үкіметке қарсы наразылық шерулеріне қатысушылар қаржы министрінің резиденциясына және бірнеше жоғары лауазымды тұлғалардың үйлеріне басып кірді. Митингке шыққандар мүліктерді тонай бастаған, бірақ қарулы күштер оларды кейін шегіндірді, деп хабарлайды Orda.kz SVTV NEWS ақпарат көзіне сілтеме жасап.

Наразылық акциялары 25 тамыз күні басталып, қазіргі таңда Бали аралы да қоса алғанда елдің барлық өңірлерін дерлік қамтып отыр. Наразылыққа себеп болған жағдай — депутаттарға 50 миллион рупий көлемінде тұрғын үйге арналған өтемақы төлеу туралы шешім. Бұл сома үш мың АҚШ долларынан асады және Джакартадағы ең төменгі жалақыдан он есе жоғары.

Көшеге шыққан жұрт жалақыны көтеруді, еңбек жағдайын жақсартуды және парламенттің таратылуын талап етуде. Наразылықтар зорлықпен қатар жүруде: Макассар қаласында өңірлік парламент ғимараты өртеліп, үш адам қаза тапты. Басқа қалаларда да өрт қою жағдайлары тіркелді.

Индонезия президенті Прабово Субианто Қытайға жоспарланған сапарынан бас тартып, даулы төлемдерді тоқтататынын мәлімдеді. Джакартада және бірнеше өңірде қауіпсіздік шаралары күшейтілді, полиция көз жасаурататын газ және су атқыш құралдар қолдануда.

Бұқаралық ақпарат құралдарының мәліметінше, тәртіпсіздіктер кезінде кемінде төрт адам қаза тауып, бірнеше адам ауыр жараланған.

Біз жақында Индонезияда  есірткімен айналысқан екі қазақстандық ату жазасына кесілуі мүмкін екенін хабарлағанбыз. 

 
Былтыр Индонезия астанасы Джакартада 10-14 желтоқсан аралығында ММА бойынша ересектер арасында әлем чемпионаты өтіп, қазақстандық спортшылар 19 медаль жеңіп алды.