Индонезияда магнитудасы 7,7 болатын күшті жер сілкінісі болды: Қаза тапқандар бар

Индонезияның Флорес өңірінде болған күшті жер сілкінісінен ғимараттар қирап, қатты зақымданды. Осы уақытқа дейін бес адамның қаза тапқаны белгілі. Шамамен екі мың тұрғын қауіпсіз жерге көшірілген, деп хабарлайды Orda.kz.

АҚШ Геологиялық қызметінің мәліметінше, 15 тамызда жергілікті уақыт бойынша таңғы сағат 5:58-де магнитудасы 7,7 болатын жер сілкінісі тіркелген. Жерасты дүмпулерінің ошағы 10 шақырым тереңдікте орналасқан.

Индонезияның Метеорология, климатология және геофизика агенттігі (BMKG) кейін жер сілкінісінің ошағы 15 шақырым тереңдікте болғанын нақтылады. Жер сілкінісінің эпицентрі Шығыс Нуса-Тенгара провинциясындағы Нагекео қаласынан шамамен 30 шақырым солтүстік-шығысқа қарай, теңізде орналасқан. Негізгі дүмпуден кейін жер сілкінісі бірнеше рет қайталанған. 

Reuters агенттігінің мәліметінше, кемінде бес адам қаза тауып, бірнеше адам жарақат алған. Шығыс Нуса-Тенгара провинциясының губернаторы Эмануэль Мелькиадес Лака Лена бұған адамдар ұйықтап жатқан кезде ғимараттардың опырылып құлауы себеп болғанын айтты.

Associated Press агенттігінің хабарлауынша, жер сілкінісінен кейін тұрғындар арасында дүрбелең басталған. Флорес аралындағы Маумере қаласында үйлер айтарлықтай қираған. Тұрғын үйлер мен әкімшілік ғимараттар, қоймалар және басқа да нысандар зақымданған. Электр қуатымен қамтамасыз ету үзілген. Сондай-ақ кемінде бір көшкін болғаны да тіркелді.

Энде қаласындағы ауруханада науқастар қауіпсіздік мақсатында ғимараттан сыртқа шығарылған. Нагекео қаласының шамамен екі мың тұрғыны эвакуацияланған.

Жер сілкінісінен кейін цунами қаупі туралы ескерту жарияланды. Алайда Индонезияның Метеорология, климатология және геофизика агенттігі жергілікті уақыт бойынша сағат 07:30-да ескертуді алып тастады.

Агенттік мәліметінше, жер сілкіністері әлі де қайталанып жатыр. Негізгі дүмпуден кейін тағы да магнитудасы 5,6 және 5,3, кейін тағы 5,0 болатын жерасты толқындары тіркелген.

Еске сала кетейік, 24 маусымда Венесуэланың  солтүстігінде магнитудасы 7,2 және 7,5 болатын екі күшті жер сілкінісі шамамен 40 секунд айырмашылықпен болған. Соңғы мәлімет бойынша, бұл табиғи апаттан қаза тапқандар саны 5,3 мыңнан асқан.

Оқи отырыңыз:

• Алматы тұрғындары жер сілкінісін сезді
• Венесуэла жағалауында магнитудасы 7,1-ге тең жойқын жер сілкінісі болды
• Венесуэладағы жер сілкінісі: Құрбандар саны 1,4 мыңға жетті