ІІМ қазақстандықтардың жеке деректері сатылды деген ақпаратқа өз жауабын берді

Қазақстандықтардың жеке деректері сатылып жатқаны туралы ақпаратқа Ішкі істер министрлігі жауап берді, деп хабарлайды Orda.kz.       

ІІМ халықтың жеке деректері сатылымға шығарылды деген ақпаратқа алаңдаушылығын назардан тыс қалдырмай, аталған мәліметті тексерді. Қазіргі таңда eGov порталына рұқсатсыз қол жеткізу фактілері тіркелмеген.

Сонымен қатар министрлік мұндай хабарландырудың пайда болу фактісін де назардан тыс қалдырған жоқ. Қазір хабарландыруды жариялаған адамның кім екенін, ұсынылған деректердің қайдан алынғанын, сондай-ақ оларды заңсыз жолмен иемденуге және таратуға қатысы бар барлық тұлғаларды анықтау бойынша қажетті шаралар қабылданып жатыр.

ІІМ өз құзыреті шегінде азаматтардың жеке деректерін қорғауға қатысты Конституцияда бекітілген кепілдікті қамтамасыз етуге жауапкершілікпен қарайтынын атап өтті.

«Барлық қатысы бар тұлғаларды анықтау үшін қажетті шаралар түгелдей қабылданады. Ешкім жауапкершіліктен құтылмайды. Бұл жұмыс Ішкі істер министрлігінің ерекше бақылауында», деп мәлімдеді ведомство. 

Еске салсақ, бүгін таңертең хабарлағанымыздай eGov жүйесі бұзылып, 15 млн қазақстандықтың жеке деректері тарады деген ақпарат расталмады. Жасанды интеллект және цифрлық даму министрлігі ақпараттық жүйелерді тексеріп, бұзу белгілерін анықтамағанын мәлімдеді.

Министрлік мәліметінше мамандар белгісіз адамның қараңғы интернетте сатылымға шығарған деректері делінген файлдарын тапқан. Ведомство олар әртүрлі файлдар мен суреттерден құралған жиынтық болып шыққан және eGov жүйесінен жүктеп алынған деректер базасы емес екенін мәлімдеді. 

Хабарландыру авторы файлдың көлемі 2,7 гигабайт екенін және оның ішінде төлқұжат деректері, телефон нөмірлері, электрондық пошта мекенжайлары, жұмыс орындары, құжаттардың скан-көшірмелері мен құпиясөздер көрсетілген 47 млн жол бар екенін жазған.

Оқи отырыңыз:

• Министрлік eGov бұзылып, 15 млн адамның дерегі тарап кетті деген ақпаратқа түсініктеме берді
• Туған нәрестесін 800 мыңға саудалап, 100 мың теңгеге сатпақ болған әйел сотталды