Министрлік eGov бұзылып, 15 млн адамның дерегі тарап кетті деген ақпаратқа түсініктеме берді

eGov жүйесі бұзылып, 15 млн қазақстандықтың жеке деректері тарады деген ақпарат расталмады. Жасанды интеллект және цифрлық даму министрлігі ақпараттық жүйелерді тексеріп, бұзу белгілерін анықтамағанын мәлімдеді, деп хабарлайды Orda.kz.

Министрлік уәкілетті органдармен бірлесіп, жүйелерге техникалық тексеру жүргізген.

«eGov ақпараттық жүйелерінің бұзылғаны анықталған жоқ»,  деп хабарлады Үкімет.

Мамандар белгісіз адамның қараңғы интернетте сатылымға шығарған деректері делінген файлдарға қол жеткізген. Ведомствоның мәліметінше, олар әртүрлі файлдар мен суреттерден құралған жиынтық болып шыққан және eGov жүйесінен жүктеп алынған деректер базасы емес.

«Мәліметтер жиынтығының мәлімделген көлемі мен мазмұны бір-біріне сәйкес келмейді. Сонымен қатар eGov жүйелерінде хабарландыру авторы көрсеткендей, төлқұжат скандарының базасы жоқ. Цифрлық құжаттар мүлде басқа тәсілмен қалыптастырылып, сақталады»,  деп түсіндірді министрлік. 

Еске салайық, кеше таңертең 15 млн қазақстандықтың жеке деректері таралуы мүмкін екені туралы ақпарат пайда болған еді. Хабарландыру авторы файлдың көлемі 2,7 гигабайт екенін және оның ішінде төлқұжат деректері, телефон нөмірлері, электрондық пошта мекенжайлары, жұмыс орындары, құжаттардың скан-көшірмелері мен құпиясөздер көрсетілген 47 млн жол бар екенін мәлімдеген.

Белгісіз адам бұл деректерді 0,5 биткоинге, яғни шамамен 32 мың долларға сатылымға шығарған.

Оқи отырыңыз:

• Өскелең ұрпаққа өнеге: Тоқаев бір топ қоғам қайраткеріне мемлекеттік награда тапсырды
• Лифтідегі төбелес «пранк» болып шықты: Қызылорда тұрғыны айыппұл арқалады