Ғұмырын сахна өнеріне арнаған Балтабай Сейітмамытұлы көз жұмды

Қазақстанның еңбек сіңірген қайраткері, «Құрмет» орденінің иегері, актер, режиссер Балтабай Сейітмамытұлы өмірден өтті, деп хабарлайды Orda.kz. 

Қаралы хабарды мәдениет және ақпарат министрлігі жеткізді. Актер 76 жасына қараған шағында көз жұмды. 

Балтабай Сейітмамытұлы 1950 жылы 11 сәуірде Алматы облысы Жамбыл ауданының Қастек ауылында туған. «Жүрегім ашық жақсыға» кітабының, жарияланған спектакль рецензияларының авторы.

Ол I.Есенберлиннің «Ғашықтар» (Амантай), Е. Ерубаевтың «Менің құрдастарым» (Рахмет), С. Жүнісовтың «Жаралы гүлдер» (Военком), А.П. Чеховтың «Шағала» (Тригорин), Ш. Мұртазаның «Бесеудің хаты» (Иванов), У. Шекспирдің «Даулы түнгі думан» (Тизей), М. Әуезовтың «Абай» (Айдар) спектакльдерінде ойнады. 

Сейітмамытұлы 2002 жылы Қазан қаласында өткен Халықаралық Түркітілдес елдердің театр фестивалінде Иран-Ғайыптың «Қорқыттың Көрі» аңыз-дастанындағы Қорқыт рөлі үшін, «Ең үздік ер адам бейнесі» жүлдесі бойынша Халықаралық театрлар фестивалінің екінші мәрте лауреаты атанды. «Алтын қанатты адам» сыйлығын иеленді.

Оқи отырыңыз: 

• Қарағанды облысында 4 жыл бойы темірді шетелге заңсыз шығарған кәсіпорын сотқа тартылды
• Шавкат Рахмонов UFC-дің жартылай орта салмақ дәрежесіндегі рейтингінен шығып қалды
• Төбелестен кейін жұмыстан кеткен Сәпиев бірден жаңа қызметке тағайындалды