Future Games: Қазақстан намысын жалғыз команда қорғайтын болды

Астанада өтіп жатқан халықаралық Future Games (Болашақ ойындары) аясында Dota 2 бойынша ірі турнир басталды. Қазақстан намысын Астанадағы халықаралық турнирде  жалғыз команда қорғайды, деп хабарлайды Orda.kz.       

Бұл додаға әлемнің әртүрлі елдерінен келген 16 команда қатысып, ең мықты ұжым атағы үшін бақ сынауда. Қазақстан атынан бұл жарысқа Rune Eaters командасы қатысуда. Ең бастысы — турнирдегі жалғыз толықтай қазақстандық құрамнан құралған команда осы.

 Жарысқа қатысушы 16 команда төрт топқа бөлінген. Rune Eaters іріктеу кезеңінде жеңіске жетіп, осы халықаралық додаға жолдама алған.

Команда өкілі Мәди өтегенов айтуынша, олардың мақсаты — ел намысын абыроймен қорғау:

«Біз Қазақстанды дәл қазір Dota 2 бойынша таныстырып отырмыз. Турнирге іріктеуден өтіп келдік. Сондықтан халықаралық аренада еліміздің туын қорғап, кем дегенде үздік үштікке кіруді көздейміз», — деді ол. 

Команда үшін ең қиын қарсыластар Қытай ұжымдары болып отыр. Әсіресе Xtreme Gaming секілді мықты командалар ерекше қауіпті.

«Қытайлық Dota 2 мектебі әрқашан әлемдегі ең күштілердің бірі саналады. Бұрын біз соларға қарап бой түзесек, қазір олармен тең дәрежеде ойнап, тіпті жеңуге де дайынбыз», — деді Мәди Өтегенов журналистерге.

Қазақстандық ойыншылар бұл турнирге үлкен тәжірибемен келген. Бұған дейін команда Парижде өткен Esports World Cup жарысына қатысып, 5-орын алған. Әрине, бұл нәтиже команданың деңгейі жоғары екенін көрсетеді.

Rune Eaters құрамында еліміздің әр өңірінен, атап айтсақ, Алматы, Шымкент, Павлодар, Өскеменнен жиналған ойыншылар бар. Олардың жас ерекшелігі де әртүрлі, ең үлкен ойыншы — 27 жаста, ең жасы — 20-да.

Бұл турнир — ел үшін тарихи оқиғалардың бірі әрі Қазақстан киберспорты үшін маңызды қадам.  Себебі, осындай деңгейдегі жарыс елімізде алғаш рет өткізіліп отыр.

Сонымен қатар, Rune Eaters ұйымы тек Dota 2 емес, басқа да ойындарда, мысалы, Counter-Strike, Mobile Legends, Bang Bang өнер көрсетуде.

Астанадағы бұл турнир — қазақстандық киберспорттың дамып келе жатқанын көрсететін маңызды кезең. Rune Eaters командасы тек қатысып қана қоймай, жүлделі орындарға таласуға ниетті.

Егер команда өз мақсатына жетсе, бұл еліміздің киберспорттағы беделін одан әрі арттыра түсетіні сөзсіз.

Еске салсақ, кеше Тоқаев Астанада «Болашақ ойындарын» өзі ашты. Мемлекет басшысы Қасым-Жомарт Тоқаев Астанада өткен «Болашақ ойындары – 2026» халықаралық турнирінің ашылу салтанатында сөз сөйлеп, жарысқа қатысушылар мен қонақтарды құттықтап, олардың басын қосқан ауқымды шараның маңызын атап өтті.

Оқи отырыңыз:

• Тоқаев Астанада «Болашақ ойындарын» ашты: Қазақстан бейбітшілік пен дамуды қолдайды
• УЕФА мен оған мүше 55 ел ФИФА жарыстары мен Әлем чемпионатына бойкот жариялады