Филиппиннің экс-президенті 76 адамды өлтіруге қатысы бар деп айыпталды

Филиппиннің бұрынғы президенті Родриго Дутертеге 76 адамды өлтіруге қатысы бар деп айып тағылып жатыр, деп хабарлайды Orda.kz.      

80 жастағы саясаткерге қатысты істі Халықаралық қылмыстық сот қарайды. Айыптаушы тарап оның есірткімен және есірткі саудасымен күресі барысында қаза тапқандардың арасында балалар да болғанын мәлімдеді.

Айыптаулар адамзатқа қарсы қылмыстардың үш тармағын қамтиды: кісі өлтіру, азаптау және зорлау. Бұл қылмыстар Дутерте жариялаған «есірткіге қарсы соғыс» кезінде жасалғаны айтылды.

Құқық қорғаушылардың пікірінше, Дутерте алдымен қала әкімі, кейін президент болған алты жыл ішінде жүргізген науқан барысында ондаған мың адам сотсыз, сұрақсыз өлтірілген. Олардың қатарында есірткі сатушылар, есірткі тұтынушылар және басқа да азаматтар болған.

Халықаралық қылмыстық сот прокурорларының айтуынша, 2011 жылғы 1 қарашадан 2019 жылғы 16 наурызға дейінгі кезеңде ол кем дегенде 76 адамды өлтіруге қатысы бар.

Филиппиннің экс-басшысына қатысты халықаралық сын толқыны оған әсер етпеген. Керісінше, Родриго Дутерте өзі елін құртып жатыр деп санайтын «миллиондаған нашақорларды қуана жоятынын» айтқан.

Ол 2025 жылдың наурызында Манила әуежайында ұсталып, Гаагаға жеткізілген.  Дутерте Халықаралық қылмыстық соттың юрисдикциясын мойындамайды. Ол сот отырысына қатысудан бас тартқан.

Оқи отырыңыз:

• Филиппин вице-президенті президентке қастандық жасауға киллер жалдаған
• Әлем көз тіккен көшбасшылар салғыласуды қойып іске көшті: Трамптың атомдық сүңгуір қайықтары Ресей жағалауына қойылды ма?
• Хамас бітімге қол қойған екінші күні тағы 14 кепілді босатады