Еуразиялық даму банкі Қазақстан экономикасына қанша қаржы құйды

Еуразиялық даму банкі 2022–2026 жылдары Қазақстан экономикасына 5,2 млрд доллар инвестиция салды. Бұл туралы ұйым басшысы Николай Подгузов президент Қасым-Жомарт Тоқаевпен кездесуде мәлімдеді, деп хабарлайды Orda.kz.      

2022–2026 жылдар арралығында ЕАДБ кезекті бесжылдық стратегиясын жүзеге асырып жатыр. Осы кезеңде жалпы инвестиция көлемі 9,2 млрд доллар болса, оның 56,5 пайызы Қазақстанға тиесілі. Подгузовтың айтуынша, республикаға салынған бұл қаржы банк қызмет еткен алдыңғы 15 жылдағы жалпы инвестициялармен шамалас. Биыл банк өзінің 20 жылдығын атап өтуде.

Жалпы 2,1 млрд доллар өнеркәсіпті дамытуға, 1 млрд доллар энергетикаға, 1,1 млрд доллар қаржы секторына бағытталыпты. Сонымен қатар, ЕАДБ цифрландыруды қолдауға және жасанды интеллектті енгізуге ерекше назар аударып отыр.

Подгузов сондай-ақ ЕАДБ-ның Қазақстан экономикасының дамуына қатысты болжамын ұсынды. Онда 2026 жылы ЖІӨ-нің нақты өсімі 2025 жылғы 6,5 пайыздан кейін кемінде 5,5 пайыз болады деп күтіледі. Мұндай нәтижеге үздіксіз инвестициялық белсенділік, ауқымды инфрақұрылымдық бағдарламалар, тұрақты ішкі сұраныс және берік әлеуметтік көрсеткіштер арқылы қол жеткізу жоспарланған.

ЕАДБ-ның 2022–2026 жылдарға арналған Қазақстан бойынша стратегиясында 3,8 млрд доллар көлемінде түрлі жобаларды қаржыландыру көзделген. Басқа қатысушылардың инвестицияларын қоса есептегенде, жалпы қаражат 10 млрд доллардан асады. Сонымен қатар, ұйым сайтында көрсетілгендей, барлық елдердегі жүзеге асырылған жобаларды ескере отырып, инвестициялық портфель көлемі 2024 жылдың соңында 15,4 млрд доллар болған.

ЕАДБ Ресей, Беларусь, Қазақстан, Қырғызстан, Армения, Тәжікстан және Өзбекстан елдерінде инфрақұрылымдық және әлеуметтік маңызы бар жобаларды қаржыландыруға маманданған. Банктің жарғылық капиталындағы Қазақстанның үлесі 37,29 пайыз және бұл көрсеткіш бойынша республика Ресейден кейін (44,79 пайыз) екінші орында. Беларусьтің үлесі 5,21 пайыз, Тәжікстан – 4,26 пайыз, ал Қырғызстан мен Армения – 4,23 пайыз.

Оқи отырыңыз:

• Тоқаев Азия чемпионатында табысты өнер көрсеткен Қазақстанның ұлттық бокс құрамасын құттықтады
• Құрылтай сайлауы тамыз айында өтеді
• Тоқаев «Әл-Фараби» орденін енгізуді ұсынды