«Есімімді кірлетуге жол бермеймін»: Михаил Шайдоров жалақы дауына қатысты мәлімдеме жасады

Қазақстандық мәнерлеп сырғанаушы Михаил Шайдоров өзіне қатысты тараған сындарға жауап беріп, атына негізсіз айып тағылып жатқанын мәлімдеді, деп хабарлайды Orda.kz.

Бұған дейін Спортты дамыту дирекциясы спортшыға жалақы төленбегенін жаңа келісімшартқа әлі қол қойылмағанымен түсіндірген болатын.

Шайдоровтың айтуынша, 2026 жылға арналған жаңа келісімшартты өзі және командасымен тек мамыр айының ортасында ғана талқылай бастаған. Ал жалақы наурыз айынан бері төленбей келеді.

Мәнерлеп сырғанаушының сөзінше, келісімшарттың әлі келісілмеуі қаржы мәселесіне де, оның Қазақстанға келуден бас тартуына да байланысты емес. Спортшының айтуынша, 2026 жылдың соңына дейін әрекет ететін келісімде 2030 жылғы Олимпиададан медаль алу міндеті көрсетілген.

«Біз командамен бірге бұл тармақты заңдық тұрғыдан қайта қарауды ғана сұрадық. Өйткені бұл қисынсыз әрі мүмкін емес нәрсе, мен 2026 жылы тек төрт жылдан кейін өтетін Олимпиадада жеңіске жете алмаймын», – деді Шайдоров. 

Оның сөзінше, команда заңгерлерге сұрақ жолдап, аталған тармақты қайта қарауды сұраған. Алайда осы уақытқа дейін нақты жауап болмаған.

Шайдоров 5 маусымнан бастап оқу-жаттығу жиындары жоспарланғанын айтты. Оның айтуынша, команда алдын ала смета жіберіп, бағдарлама қою, жиындар мен әуе билеттері төленетіні туралы бірнеше рет сұраған. Алайда әзірге нақты жауап берілмеген. Жаттығу жиындарын ұйымдастыру мәселесі де шешілмеген, ал ұшу уақытына бір апта ғана қалған.

Ол Олимпиада ойындарына арналған сыйақы мәселесіне де тоқталды, бұл рәсім уақытты қажет ететінін түсінеді және бұл мәселеге қатысты шағымы жоқ.

Өмір бойғы төлемдер туралы Шайдоров министрлік таратқан ақпараттың толық нақты болмағанын айтты. Оның сөзінше, мұндай төлемдерді алу үшін кемінде 20 жыл еңбек өтілі болуы қажет, ал қазір оның жасы небәрі 21-де.

«Қазіргі уақытта бұл төлемдерге үміт артып отырған жоқпын. Болашақта мұндай еңбек өтілін жинауым мүмкін, бірақ қазір бұл туралы айтуға әлі ерте» деп жазды спортшы.

Михаил Шайдоров ешқандай мемлекеттік органмен қақтығысқа барғысы келмейтінін, бірақ өзінің есімін көпшілік алдында «кірлетуге» жол бере алмайтынын атап өтті.

Оқи отырыңыз:

• Қазақстан халықаралық деңгейде «+7» телефон коды бойынша тең құқықты мәртебесін бекітті
• Сот процесінде Сұлтан Сәрсемалиевтің ата-анасының сөзі тыңдалды