Қазақстан халықаралық деңгейде «+7» телефон коды бойынша тең құқықты мәртебесін бекітті

Қазақстан халықаралық деңгейде «+7» телефон коды бойынша тең құқықты мәртебесін бекітті, деп хабарлайды Orda.kz.

Бұл туралы Қазақстан Республикасының Дүниежүзілік сауда ұйымы (ДСҰ) және халықаралық экономикалық ұйымдар жанындағы тұрақты өкілі Қайрат Төребаев мәлімдеді.

Халықаралық электр байланысы одағы (ХЭБО) — БҰҰ-ның байланыс саласындағы мамандандырылған ұйымы — Қазақстан мен Ресей арасындағы «7» телефон аймағын бірлесіп пайдалану туралы жаңа келісім жөніндегі ақпаратты ресми түрде жариялайды. Құжат 2026 жылғы 1 маусымда ХЭБО-ның жедел бюллетенінде жариялануы тиіс.

Келісім мерзімсіз негізде жасалып, 2025 жылғы 3 желтоқсанда күшіне енген.

Әңгіме Қазақстан мен Ресей бірлесіп пайдаланып отырған халықаралық «+7» коды туралы болып отыр. Жаңа келісім Қазақстанның тең құқықты серіктес мәртебесін бекітіп, елге тиесілі нақты код ауқымдарын айқындайды. Олар — +7 0, +7 6 және +7 7.

Бұл іс жүзінде нені білдіреді?

Бұған дейін келісім байланыс ведомстволары деңгейінде болған. Енді құжат екі ел үкіметтері деңгейінде бекітілді. Бұл мемлекетаралық мәртебесі жоғары келісім, яғни Қазақстанның мүддесін қорғау тетігі әлдеқайда күшейеді.

Сонымен қатар тұрақтылық кепілдіктері де артты. Бұрын тараптардың кез келгені келісімнен шығатыны туралы алты ай бұрын ескерте алатын болса, енді бұл мерзім 24 айға дейін ұзартылды.

Бұл азаматтар мен байланыс операторлары үшін үйреншікті телефон нөмірлер жүйесі алдағы жылдары да тұрақты әрі қорғалған күйінде сақталады дегенді білдіреді. Қазақстан тарабынан уәкілетті орган ретінде Қазақстан Республикасының Жасанды интеллект және цифрлық даму министрлігі белгіленді.

Бұл шарттардың ХЭБО алаңында бекітілуі Қазақстанның халықаралық байланыс ресурстарын басқару жүйесіндегі позициясын күшейтіп, цифрлық саладағы ұлттық мүдделерін қорғауға бағытталған тағы бір қадам ретінде бағаланып отыр.
 
 Оқи отырыңыз:

Қазақстан Ресейдің қазақтар көп тұратын өңірлеріне мектеп салады

Атырау облысында жол апатынан төрт адам қаза тапты