Ермұрат Бәпи Назарбаевтар әулетінің билікке оралуы жайлы пікір білдірді

Мәжіліс депутаты Ермұрат Бәпи Конституция жобасында экс-президентке қатысты қарастырылған кепілдіктер жайлы cөз қозғады, деп хабарлайды Orda.kz.

Ол негізінен 48-бабына қатысты қоғамда туындаған алаңдаушылыққа пікір білдірді.

Депутаттың айтуынша, Конституция жобасының 48-бабында Республика президентінің ар-намысы мен қадір-қасиетін қорғауға берілетін конституциялық кепілдіктер қарастырылған. Ал 48-баптың 3-тармақшасында бұл ережелер Қазақстан Республикасының экс-президентіне де қолданылады деген норма бар. Осыған байланысты қоғамда, әсіресе әлеуметтік желі қолданушылары арасында бұрынғы президенттің отбасы мүшелері билікке қайта оралуы мүмкін деген күдік айтылып жүр.

Депутат Бапи бұл алаңдаушылықты негізсіз деп санайды.

«Әлеуметтік желілердегі мұндай пікірлерді қазақы долбар-дабраға қиқу қосу деп білемін. Себебі экс-президент түгілі, қазіргі президенттің де отбасы мүшелері мен жақын туыстарының мемлекеттік қызмет атқаруына тыйым салынған», — деді ол.

Депутаттың сөзінше, бұл талап 2022 жылғы маусым айында қабылданған конституциялық заңда нақты бекітілген. Сондықтан бұрынғы президенттің отбасы мүшелерінің билікке қайта келуі туралы айтылып жүрген күдіктердің ешқандай құқықтық негізі жоқ.

Еске сала кетейік, Мәжіліс депутаты Бақытжан Базарбек жердің шетелдіктерге сатылатынын жоққа шығарды.

Оқи отырыңыз: 

• Саясаткер жаңа Конституция жасауды ұсынды
• Қазақстан Республикасының жаңа Конституциясының жобасы жарияланды
• Жаңа Конституция жобасы туралы жалған ақпарат таратқаны алматылыққа айыппұл салынды