Еліміздің оқушыларына өмірлік қиындықтарды еңсеру дағдылары үйретіледі

Жаңа оқу жылынан бастап Қазақстан мектептерінде оқушыларға өмірлік қиындықтарға төтеп беру дағдыларын үйретуге бағытталған пән қосылады деп хабарлайды Orda.kz.

Оқу-ағарту министрі Жұлдыз Сүлейменованың айтуынша, елімізде балаларға көрсетілетін мемлекеттік қолдаудың барлық шараларын бір жүйеге біріктіретін «Қазақстан балалары» тұжырымдамасы қабылданған.

«1 қыркүйектен бастап балалардың әлеуметтік-эмоционалдық дағдылары мен өмірлік қиындықтарға төтеп беру қабілетін дамытуға бағытталған «Жеке қауіпсіздік» курсы енгізіледі. 5–8 сыныптарда бұл сабақ төрт аптада бір рет, ал 9–11 сыныптарда екі аптада бір рет өткізіледі», – деді Жұлдыз Сүлейменова.

2026 жылы еліміздің барлық өңірінде Балалардың құқықтарын қорғау басқармалары құрылды. Олардың негізгі міндеті балалардың құқықтарын қорғау бойынша жұмысты үйлестіру, зорлық-зомбылықтан зардап шеккен балаларды сүйемелдеу, психологиялық қолдау орталықтарының жұмысын үйлестіру және балалар құқықтарының бұзылуын ерте анықтау.

Министрдің айтуынша, атқарылып жатқан жұмыстар халықаралық деңгейде де жоғары бағалануда. 2025 жылдың қаңтар және маусым айларында БҰҰ-ға мүше мемлекеттер Қазақстанның негізгі құқықтар мен бостандықтарды, соның ішінде балалардың құқықтарын қорғауға бағытталған реформаларына жоғары баға берген.

ЮНИСЕФ Қазақстанды Орталық Азия елдерімен қатар бірқатар Еуропа мемлекеттері үшін де балалардың құқықтарын қорғау саласындағы үлгі ретінде атап өткен.

Сонымен қатар, KidsRights Index 2026 рейтингінде Қазақстан балалардың құқықтарын қорғау саласында мықты негіз қалыптасқанын көрсетті. Ел 194 мемлекеттің ішінде 24-орынға ие болып, жаһандық Топ-25 қатарына кірді. 2025 жылы Қазақстан 25-орында болған.

Оқи отырыңыз:

• Үкімет басшысы 100-ден астам мектептің жөндеу жұмысын екі аптада аяқтауды тапсырды
• Бірінші сыныпта баға қойылмайды: Жаңа оқу жылынан бастап бағалау жүйесі өзгереді