Dior компаниясының PR-директоры Матильда Фавье жұбайымен бірге жол апатынан қаза тапты

Французиялық кинопродюсер Николя Альтмайер мен оның жұбайы, Dior компаниясының қоғаммен байланыс бөлімінің басшысы Матильда Фавье Францияның батысында болған жол апатынан қаза тапты. Бұл туралы жергілікті билік өкілдері мәлімдеді, деп хабарлайды Orda.kz France 24-ке сілтеме жасап.

Жол апаты дүйсенбі күні болған. Ерлі-зайыптылар отырған көлік басқа бір көлікті басып озу кезінде қарсы бағытта келе жатқан жүк көлігімен соқтығысқан. Матильда Фавье 57 жаста, ал Николя Альтмайер 61 жаста еді.

Николя Альтмайер ағасы Эрикпен бірге Mandarin & Compagnie продюсерлік компаниясын басқарған. Ағайындылар «OSS 117», «Brice de Nice» және Францияның бұрынғы президенті Николя Саркозидің саяси мансабына арналған «Conquest» фильмдерін түсіруге атсалысқан. 2017 жылы олар жылдың үздік француз продюсерлеріне берілетін Даниэль Тоскана дю Плантье сыйлығын иеленген.

Ерлі-зайыптылардың қазасына байланысты кино, сән және саясат әлемінің өкілдері көңіл айтты.

«OSS 117» фильмінде басты рөлді сомдаған актер Жан Дюжарден болған оқиғаны «орасан зор қайғы әрі есеңгіреткен жағдай» деп атады.

Оқи отырыңыз:

• Шетелдік туристер Алматы облысындағы тауда шашылып жатқан адам сүйектеріне тап болды
• Қуат Хамитов Қазақстанда басшылық қызметке тағайындалды