Димаш Құдайберген жаңа әлемдік концерттік турға шығады

Қазақстанның халық әртісі, әлемге танымал әнші Димаш Құдайберген жаңа әлемдік концерттік турға дайындалып жатыр, деп хабарлайды Orda.kz.       

Әншінің «DimashAli» шығармашылық орталығы Димаш Құдайбергеннің жаңа жеке концерттік туры басталатынын жариялады. Бұл туралы хабарлама Instagram әлеуметтік желісінде жарияланған.

«Біз турдың алғашқы күндерін көрсетіп отырамыз. Концерт кестесі толықтырылады, жақын арада жаңа қалалар мен концерт күндері жарияланады. Сондай-ақ жаңа турдың алғашқы концерті өтетін қала туралы ақпаратты да жақын уақытта бөлісеміз» деп жазылған хабарламада. 

Желіде жарияланған афишада Краков, Дюссельдорф, Мадрид, Мерида және әлемнің басқа да қалалары көрсетілген.

Жанкүйерлер бұл жаңалықты үлкен қуанышпен қабылдап, пкірлерін қалдырып жатыр.

Еске салсақ, Алматы қаласында ақпан айының басында Балуан Шолақ атындағы Спорт сарайында әлемге танымал әнші Димаш Құдайберген продюсерлік еткен «Көкжиектен асқан үн» атты халықаралық телевизиялық жобаның ресми тұсаукесері өтті.    

Ауқымды мәдени шараға мыңдаған көрермен жиналып, жобаның алғашқы бөліміне арналған эксклюзивті бейнематериалдарды тамашалады. Тұсаукесер барысында көрермендер түсірілім жұмыстары жүргізілген Түркістан өңірінің әсем табиғаты мен тарихи орындары көрсетілген кадрларға ерекше қызығушылық танытты.

Оқи отырыңыз:

• Алматыда Димаш Құдайберген продюсерлік еткен «Көкжиектен асқан үн» халықаралық жобасының тұсаукесері өтті
• Димаш Құдайберген Қарағандыда қаза тапқан кеншілер отбасына 20 миллион теңге аударды
• Димаш Құдайберген БҰҰ елшісі ретінде Бангладештегі босқындарға қолдау білдірді