Димаш Құдайберген Ұлттық қауіпсіздік комитетінде не істеп жүр?

Әлемге танымал қазақ әншісі Димаш Құдайберген Алматы облысы аумағындағы «Баянқол» шекара бекетіне барды, деп хабарлайды Orda.kz Қазақстан Республикасы Ұлттық қауіпсіздік комитеті баспасөз қызметіне сілтеме жасап.

Сапар барысында өнер иесі офицерлермен және әскери қызметшілермен кездесіп, олардың қызметіне және мемлекеттік шекара қауіпсіздігін қамтамасыз етуге қосқан үлесіне алғыс білдірді. Сонымен қатар Димаш Құдайберген бекет аумағында түсіріліп жатқан «Таймас» көркем фильмінің түсірілім барысымен танысты. Фильм шекарашы мен қызметтік иттің достығы туралы баяндайды.

ҰҚК  баспасөз қызметінің мәліметінше, танымал әншінің бұл сапары бөлімнің жеке құрамына қолдау көрсету мақсатында болған.

«Жарайсың, Димаш! Біздің шекарашылармен кездесуге уақыт тапқаныңызға көп рақмет. Сіз әскери қызметшілердің жауынгерлік рухын көтеріп, патриоттық сезімдерін ояттыңыз. Сізге зор денсаулық тілейміз!» деп жазды әлеуметтік желі қолданушыларының бірі. 

ҰҚК  өкілдері мұндай шаралар мемлекеттік шекарада қызмет атқарып жүрген әскери қызметшілердің моральдық рухын көтеруге көмектесетінін атап өтті.

Жақында Қазақстанның халық әртісі Димаш Құдайберген жаңа әлемдік концерттік турға дайындалып жатқаны туралы жаздық.       

«Біз турдың алғашқы күндерін көрсетіп отырамыз. Концерт кестесі толықтырылады, жақын арада жаңа қалалар мен концерт күндері жарияланады. Сондай-ақ жаңа турдың алғашқы концерті өтетін қала туралы ақпаратты да жақын уақытта бөлісеміз» деп жазылған хабарламада.  

Желіде жарияланған афишада Краков, Дюссельдорф, Мадрид, Мерида және әлемнің басқа да қалалары көрсетілген.

Оқи отырыңыз:

• Димаш Құдайберген жаңа әлемдік концерттік турға шығады
• Димаш Құдайберген Қытайда продюсер ретінде алғашқы марапатын алды
• Димаш Құдайберген БҰҰ елшісі ретінде Бангладештегі босқындарға қолдау білдірді
• «Үйіне арнайы барған»: Димаш Құдайберген Мұхтар Шахановтың ұлының қазасына көңіл айтты